Гродзянскі сельсавет
Гродзянскі сельсавет
Гродзянскі сельсавет размешчаны ў паўночнай частцы Асіповіцкага раёна і мяжуе з Лапіцкім, Ліпеньскім, Свіслацкім сельсаветамі Асіповіцкага раёна, Якшыцкім - Бярэзінскага і Лядзенскім - Чэрвеньскага раёна Мінскай вобласці. У яго склад уваходзіць 8 населеных пунктаў: вёскі Гродзянка, Гродзянец, Казімірава, Лазавое, Асавок, Цэзарова, Янаўка, аграгарадок Каменічы.
Цэнтр - в. Гродзянка - размешчаны ў 47 км ад райцэнтра ў маляўнічым месцы, акружаным з усіх бакоў разналістычным лесам.
Селішча ўзнікла ў канцы XIX стагоддзя. У пачатку XX стагоддзя было вядома як урочышча Гродзянка Пагарэльскай воласці Ігуменскага павета. У 1905 годзе Антоніем Радзівілам было створана таварыства для будаўніцтва чыгуначнай лініі Верайцы-Градзянка (пабудавана ў 1911 годзе).
Па перапісе 1917 года на месцы сучаснага паселішча было 2 населеныя пункты: пасёлак Гродзянка (67 двароў, 359 жыхароў) і чыгуначная станцыя Гродзянка (10 двароў, 35 жыхароў).
З 1935 года Гродзянка - працоўны пасёлак.
Вёска Каменічы вядомая з ХVI стагоддзя. У 1513 годзе - гэта дзяржаўнае сяло Свіслацкай воласці Мінскага ваяводства.
Каля вёскі знаходзяцца тры археалагічныя помнікі, курганныя могільнікі (усяго 119 насыпаў). З 1954 года па 2002 год Каменічы - цэнтр Каменіцкага сельсавета.
У гады Айчыннай вайны ў п. Гродзянка дзейнічала падпольная антыфашысцкая група, у навакольных лясах базіравалася Асіповіцкая партызанская брыгада. У сакавіку 1942 года партызаны разграмілі варожы гарнізон, які знаходзіўся ў Гродзянцы. Гітлераўцы спалілі пасёлак і знішчылі 350 мірных жыхароў. Разам з жыхарамі былі спалены вёскі Макаўе, Палядкі.
У памяць аб загінуўшых воінах, земляках на брацкіх магілах устаноўлены стэлы, помнікі. Агулам на тэрыторыі сельсавета налічваецца 17 помнікаў. У 1975 годзе на месцы базіравання Асіповіцкіх райкамаў КПБ і ЛКСМБ і Асіповіцкай ваенна-аператыўнай групы быў адкрыты мемарыяльны комплекс "Расоха", размешчаны ў 12 км ад Гродзянкі.
У лютым 2002 года скасаваны Гродзянскі пасялковы, Каменіцкі і Пагарэльскі сельскія саветы, і на іх аснове ўтварыўся Гродзянскі сельсавет.
У цяперашні час на яго тэрыторыі размешчаны: КСУП «Вязаўніца-Агра, два лясніцтвы, лесаўчастак, УА «Каменіцкі вучэбна-педагагічны комплекс дзіцячы сад-сярэдняя школа», Гродзянскі сельскі клуб, Каменіцкі сельскі Цэнтр культуры, дзве бібліятэкі-
кі, Градзянская амбулаторыя ўрача агульнай практыкі, Каменіцкі фельчарска-акушэрскі пункт, два аддзяленні сувязі, дзве АТС, 4 магазіны.
У ліку знакамітых ураджэнцаў сельсавета -
Таіса Канстанцінаўна Грамадчанка, 1951 г.н., беларускі крытык і літаратуразнавец, кандыдат філалагічных навук;
Пётр Адамавіч Лявіцкі, 1906 г.н., партыйны дзяржаўны дзеяч БССР, старшыня Магілёўскага аблвыканкама ў 1961-1963 гадах, узнагароджаны ордэнам Леніна, іншымі ордэнамі і медалямі;
Васіль Міхайлавіч Хацько, 1967 г.н., камандзір аддзялення пажарнай каманды, загінуў пры тушэнні самалёта, які выбухнуў, з боепрыпасамі ў Афганістане, пасмяротна ўзнагароджаны ордэнам Чырвонай Зоркі, медалём «За баявыя заслугі», яго імя носіць цэнтральная вуліца ў в.
Іван Макаравіч Стэльмах, 1912 г.н., адзін з арганізатараў
партызанскага руху на тэрыторыі Асіповіцкага раёна, тройчы абіраўся дэпутатам Вярхоўнага Савета БССР, Магілёўскага і Гомельскага абласных Саветаў народных дэпутатаў, узнагароджаны ордэнамі Леніна і Чырвонага Сцяга (двойчы), у 1982 годзе яму прысвоена званне Ганаровага грамадзяніна г. Асіповічы.
Гродзянскі сельсавет - 8 вёсак, 751 жыхар.