Осиповичский районный исполнительный комитет

24 августа 2016

Раўнадушных быць не павінна

Раённы Каардынацыйны савет грамадскіх аб’яднанняў і палітычных партый правёў чарговае пасяджэнне. Прысвечана яно было выбарам у Палату прадстаўнікоў Нацыянальнага сходу краіны.

Адкрываючы мерапрыемства, старшыня Каардынацыйнага савета Наталля Шаўчэнка прадставіла новых кіраўнікоў раённага аддзялення абласнога пошукавага Клуба "Віккру" Юрыя Сцяпанава і савета ветэранаў АДУКВП "Водаканал" Сяргея Зубарыка.

Начальнік аддзела арганізацыйна-кадравай работы райвыканкама Ганна Землянухіна праінфармавала прысутных аб кандыдатах у дэпутаты, нагадала правядзенне працэдуры акрэдытацыі назіральнікаў, акцэнтавала ўвагу на тым, што для дакладнага выканання імі функцыянальных абавязкаў трэба правесці адпаведную вучобу.

Зараз ідзе ўдакладненне спісаў выбаршчыкаў, вылучэнне назіральнікаў ва ўчастковыя камісіі і на ўчасткі для галасавання.

Сакратар райарганізацыі Камуністычнай партыі Беларусі і раённага аддзялення грамадскага аб’яднання "Беларуская федэрацыя футбола" Аляксандр Пузік прызваў фарміраваць актыўную жыццёвую пазіцыю выбаршчыкаў: прыйсці павінны ўсе, меркаванні могуць быць розныя. Важна — не застацца раўнадушнымі.

Зараз усе кандыдаты прадстаўляюць свае праграмы ў сродках масавай інфармацыі, выбаршчыкам дадзена магчымасць паслухаць, паглядзець або прачытаць іх. Галоўнае — не праігнараваць.

У абмеркаванні пытання прынялі ўдзел першы сакратар РА ГА БРСМ Алена Надзеявец, старшыня РА ГА "Беларускі Саюз ветэранаў вайны ў Афганістане" Юрый Корбан і іншыя прадстаўнікі грамадскасці.

Наталля Шаўчэнка акцэнтавала ўвагу на неабходнасці стварэння кожнай грамадскай суполкай уласнага інтэрнэт-сайта як аднаго з каналаў інфармавання насельніцтва.

Каардынацыйны Савет аднагалосна рашыў: на выбары павінны прыйсці ўсе, а роля грамадскіх аб’яднанняў яшчэ і ў тым, каб данесці да народа неабходную інфармацыю, правесці шырокую тлумачальную работу.

"Асіповіцкі край"