Осиповичский районный исполнительный комитет

11 февраля 2016

Адкрытае першынство краіны па Muay Thai-2016 прайшло Ў Асіповічах

Мінулыя выхадныя сталі сапраўдным спартыўным святам для ўсіх аматараў тайландскага боксу. Ў асіповіцкім фізкультурна-аздараўленчым комплексе “Юнацтва” прайшло адкрытае першынство краіны па Muay Thai-2016.

Павітаць удзельнікаў і пажадаць ім поспехаў у барацьбе завітаў старшыня Беларускай федэрацыі кікбоксінгу і тайландскага боксу, намеснік міністра ўнутраных спраў, камандуючы ўнутранымі войскамі генерал-маёр Юрый Караеў.

Прыняць удзел у спаборніцтвах вырашылі больш за 230 тай-баксёраў з розных куткоў Беларусі, а таксама каманда з Санкт-Пецярбурга. Асіповічы ж прадстаўлялі 17 спартсменаў, якіх трэніруюць Сяргей Гідулян і Эдуард Міховіч.

Першымі на татамі выйшлі менавіта асіповіцкія спартсмены — Іван Турбецкі і Мікіта Цвірко, якія змагаліся паміж сабой.

Асіпаўчане ўвогуле пастараліся на славу: бронзавыя медалі заваявалі Ангеліна Якубоўская, Ягор Кандоба, Цімур Лазутка і Мікіта Цвірко (узрост — 8-9 гадоў), “срэбра” — Назар Сакалоў, Яраслаў Трухановіч (8-9), Уладзіслаў Дзінгалёў, Ягор Аўсянікаў і Данііл Волкаў (10-11). І, нарэшце, чэмпіёнамі сталі Павел Альшанік, Цімафей Абрамчык, Максім Валадковіч (8-9) і Ян Абрамчык (14-15).

Дарэчы, тайскі бокс уключаны ў праграму Алімпіяды-2016 у Бразіліі. Пакуль — толькі ў выглядзе паказальных выступленняў спартсменаў.

"Асіповіцкі край"