24.12.2020

Збор другасных матэрыяльных рэсурсаў у Беларусі вырас прыкладна на 2,5 працэнта

Збор другасных матэрыяльных рэсурсаў у Беларусі ў бягучым годзе, паводле папярэдніх ацэнак, вырас прыкладна на 2,5 працэнта. Аб гэтым паведаміў намеснік дырэктара ДУ "Аператар другасных матэрыяльных рэсурсаў" Арцём Шкрыль у час круглага стала ў прэс-цэнтры БЕЛТА.

"За апошнія гады ў нашай краіне ўстаноўлена больш за 170 тыс. кантэйнераў для раздзельнага збору адходаў у шматкватэрным жылым фондзе. Мы таксама робім упор на развіццё раздзельнага збору ў прыватным сектары. Толькі ў бягучым годзе за кошт сродкаў ДУ "Аператар другасных матэрыяльных рэсурсаў" больш за 40 раёнаў Беларусі атрымаюць больш як 350 тыс. кантэйнераў для прыватнага сектара. Гэта значыць, мы пашыраем геаграфію, робім гэту сістэму больш зручнай і даступнай для ўсяго насельніцтва краіны. Як вынік, мы чакаем рост збору ДМР у гэтым годзе прыкладна на 2,5 працэнта, у тым ліку адходаў пластыку", - сказаў Арцём Шкрыль.

У Беларусі таксама развіваецца сістэма сартавання адходаў. "У краіне дзейнічае сем смеццеперапрацоўчых, смеццесартавальных заводаў і больш за 80 станцый сартавання. На бліжэйшую пяцігодку запланавана будаўніцтва яшчэ 16 рэгіянальных аб'ектаў па сартаванні", - адзначыў намеснік дырэктара.

Акрамя таго, у бягучым годзе са сродкаў ДУ "Аператар другасных матэрыяльных рэсурсаў" быў прафінансаваны праект па мадэрнізацыі вытворчасці "Белдругаспалімер".