13.06.2025

Выпускныя вечары для вучняў 11-х класаў пройдуць сёння ў Беларусі

Сёння ў Беларусі пройдуць выпускныя вечары для вучняў 11-х класаў, паведамляе БЕЛТА.

Выпускныя вечары з уручэннем атэстатаў аб агульнай сярэдняй адукацыі, у тым ліку асаблівага ўзору з узнагароджваннем залатым або сярэбраным медалём, пройдуць на базе школ. У асобных выпадках мерапрыемства адбудзецца ва ўстановах дадатковай адукацыі дзяцей і моладзі, установах культуры. Час пачатку выпускнога вечара, яго працягласць, а таксама месца правядзення вызначаны рашэннем кіраўніка ўстановы з удзелам бацькоўскага камітэта.

Міністэрства адукацыі рэкамендавала, каб свята максімальна было арганізавана сіламі педагогаў, выпускнікоў пры падтрымцы бацькоў. Чырвонай ніткай праз усе мерапрыемствы пройдзе тэма 80-годдзя Вялікай Перамогі. Для таго, каб выпускны вечар стаў сапраўды запамінальнай і значнай падзеяй, усе актыўнасці будуць аб'яднаны пад агульнай канцэпцыяй, якая будзе адлюстроўваць глыбокі сэнс і каштоўнасці, закладзеныя ў жыцці школы. Напрыклад, ведамства прапанавала арганізаваць свята ў фармаце прэзентацыі кінафільма або цырымоніі ўзнагароджвання "11 лет #ВМОМЕНТЕ". Таксама адной з канцэпцый можа стаць "Кніга ведаў", або збіральны вобраз "Крылатых арэляў", які мае глыбокую сімвалічную значнасць, звязаную з ідэяй палёту, пакарэння неба і імкнення да найвышэйшых мэт. Прапануецца разгледзець тэму "Дрэва ведаў" або "Падарожжа ў часе".

Усяго ў гэтым годзе выпускнікамі 11-х класаў сталі больш як 56 тыс. маладых людзей.

БелТА