25.01.2021

У Беларусі зацверджаны будаўнічыя нормы для асвятлення і вышынных будынкаў

Новыя будаўнічыя нормы зацверджаны ў Беларусі. Гэта прадугледжана дзвюма пастановамі Міністэрства архітэктуры і будаўніцтва, якія сёння афіцыйна апублікаваны на Нацыянальным прававым інтэрнэт-партале, паведамляе БЕЛТА.

Пастановай нумар 70 ад 30 кастрычніка 2020 года зацверджаны будаўнічыя нормы "Натуральнае і штучнае асвятленне". Гэтыя нормы ўстанаўліваюць патрабаванні да праектавання натуральнага і штучнага асвятлення памяшканняў будынкаў і збудаванняў рознага прызначэння, што ўзводзяцца і рэканструююцца, месцаў вытворчасці работ па-за будынкамі, пляцовак прамысловых і сельскагаспадарчых прадпрыемстваў, чыгуначных пуцей на прадпрыемствах, а таксама знадворнага асвятлення гарадоў, пасёлкаў гарадскога тыпу і сельскіх населеных пунктаў. Яны распаўсюджваюцца на праектаванне ўстройстваў мясцовага асвятлення, якія пастаўляюцца камплектна са станкамі, машынамі і вытворчай мэбляй, і не распаўсюджваюцца на праектаванне асвятлення падземных вырабатак, рачных партоў, аэрадромаў, чыгуначных станцый і іх пуцей, спартыўных збудаванняў, памяшканняў для захоўвання сельгаспрадукцыі, размяшчэння раслін, жывёл, птушак, а таксама на праектаванне спецыяльнага тэхналагічнага і ахоўнага асвятлення пры прымяненні тэхнічных сродкаў аховы.

Другой апублікаванай сёння пастановай Мінбудархітэктуры ад 13 лістапада 2020 года нумар 85 зацверджаны буднормы "Вышынныя будынкі". Яны распаўсюджваюцца на вышынныя жылыя і грамадскія будынкі, якія ўзводзяцца і рэканструююцца, і ўстанаўліваюць патрабаванні да іх праектавання.

Будаўнічыя нормы распрацаваны РУП "Будтэхнорм" і ўнесены галоўным упраўленнем горадабудаўніцтва, праектнай, навукова-тэхнічнай і інавацыйнай палітыкі Мінбудархітэктуры. Нормы будуць уведзены ў дзеянне праз 60 каляндарных дзён пасля іх афіцыйнага апублікавання.

БелТА