14.09.2021

У Беларусі ў мінулым годзе карыстальнікамі бібліятэк сталі больш за 2,9 млн чалавек

У 2020 годзе карыстальнікамі бібліятэк сталі больш за 2,9 млн чалавек, гэта значыць кожны трэці жыхар краіны. Аб гэтым гаворыцца ў аглядзе Нацыянальнага статыстычнага камітэта, паведамляе БЕЛТА.

Штогод 15 верасня ў Беларусі адзначаецца Дзень бібліятэк. У 2020 годзе ў бібліятэчнай сферы працавалі 13 тыс. чалавек. Большасць з іх (звыш 90 працэнтаў) - жанчыны. Больш як палова супрацоўнікаў бібліятэк маюць вышэйшую адукацыю. Сярэдні ўзрост работнікаў крыху большы за 45 гадоў.

"На пачатак 2020 года ў Беларусі ажыццяўлялі сваю дзейнасць 2509 публічных бібліятэк. Сярод іх 83,6 працэнта былі забяспечаны доступам у інтэрнэт. Для гэтага ў мінулым годзе публічныя бібліятэкі выкарыстоўвалі больш за 8,7 тыс. камп'ютараў", - расказалі ў Нацыянальным статыстычным камітэце.

Фонд публічных бібліятэк перавышае 52 млн экзэмпляраў кніг, часопісаў, рукапісаў і іншых крыніц інфармацыі. Нараўне з друкаванымі выданнямі карыстальнікам даступны выданні ў электронным выглядзе: каталогі, публікацыі і іншыя інфармацыйныя крыніцы. У сярэднім на адну бібліятэку прыпадае 21 тыс. экзэмпляраў, на аднаго чытача - 18 экзэмпляраў.

У 2020 годзе карыстальнікам бібліятэк быў кожны трэці жыхар краіны - больш за 2,9 млн чалавек. У сярэднім на адну бібліятэку прыпадае больш за 1,5 тыс. карыстальнікаў. За 2020 год ім было выдадзена больш за 48 млн экзэмпляраў, або па 17 экзэмпляраў аднаму чытачу.

Галоўнае кнігасховішча краіны - Нацыянальная бібліятэка. У ёй сканцэнтравана больш за 19 працэнтаў фонду ўсёй краіны (10,1 млн экзэмпляраў). Колькасць карыстальнікаў бібліятэкі ў 2020 годзе перасягнула 190 тыс. чалавек.

БелТА