08.10.2025

У Беларусі стартавала масавая вакцынацыя насельніцтва супраць грыпу

У Беларусі стартавала масавая вакцынацыя насельніцтва супраць грыпу. Аб гэтым журналістам паведаміла намеснік міністра аховы здароўя - галоўны дзяржаўны санітарны ўрач Беларусі Святлана Нячай, перадае карэспандэнт БЕЛТА.

Намеснік міністра адзначыла, што захваральнасць на рэспіраторныя інфекцыі пачынае падрастаць. "Кастрычнік - лістапад - гэта самы прыдатны час для актыўнай вакцынапрафілактыкі грыпу і кавід-інфекцыі. На мінулым тыдні мы абазначылі старт вакцынацыі супраць грыпу - пачалі актыўна вакцынавацца прадпрыемствы, кіраўнікі якіх клапоцяцца аб стане здароўя сваіх работнікаў. Масавая вакцынацыя насельніцтва нашай краіны пачынаецца сёння. Вакцына "Грыпол-плюс", якая будзе выкарыстоўвацца для вакцынацыі, прайшла кантроль якасці, паступіла ў арганізацыі аховы здароўя, і сёння, пачынаючы з Міністэрства аховы здароўя, мы пачынаем гэту масавую кампанію", - расказала Святлана Нячай.

Паводле даных Міністэрства аховы здароўя, за мінулы год вакцынавалася амаль 20 працэнтаў насельніцтва краіны. "Людзі, якія клапоцяцца аб сваім здароўі, людзі з груп рызыкі, якія маюць сур'ёзныя саматычныя захворванні, актыўна скарысталіся гэтым напрамкам і цяпер актыўна ўдакладняюць, калі пачнецца вакцынацыя. Я вельмі спадзяюся, што гэты перыяд пацяплення, які надыходзіць, таксама будзе садзейнічаць таму, што людзі актыўна скарыстаюцца гэтай магчымасцю", - падкрэсліла намеснік міністра.

БелТА