26.05.2023

Такаеў: галоўная мэта ЕАЭС - фарміраванне сапраўды безбар'ернага рынку

Першарадная задача Еўразійскага эканамічнага саюза - сфарміраваць адзіны, сапраўды безбар'ерны рынак. Аб гэтым Прэзідэнт Казахстана Касым-Жамарт Такаеў заявіў на пасяджэнні Вышэйшага Еўразійскага эканамічнага савета ў шырокім складзе, перадае карэспандэнт БЕЛТА.

Паводле слоў Прэзідэнта Казахстана, першарадная задача ЕАЭС - фарміраваць адзіны, сапраўды безбар'ерны рынак і забяспечыць бесперашкодны транзіт тавараў у трэція краіны.

"Поўнае дасягненне гэтых мэт павінна стаць ключавым напрамкам работы ўрадаў і Еўразійскай эканамічнай камісіі, - падкрэсліў ён. - Нам неабходны паўнацэнны, сістэмна функцыянуючы ўнутраны рынак саюза. Толькі ў гэтым выпадку нацыянальны бізнес і замежныя партнёры цалкам павераць у патэнцыял саюза".

Таксама Касым-Жамарт Такаеў лічыць важным развіваць інстытут наглядальнікаў пры ЕАЭС і прыцягваць гэтыя краіны да сумесных кааперацыйных і інфраструктурных праектаў. "Думаю, нашым партнёрам будзе асабліва цікава кааперацыя ў энергетыцы, сельскай гаспадарцы, транспартна-лагістычнай сферы", - сказаў ён.

Яшчэ адным напрамкам, які патрабуе паскоранага развіцця, Прэзідэнт Казахстана назваў прамысловасць. "Мы пачалі рэалізацыю шэрага шматбаковых кааперацыйных праектаў і міждзяржаўных праграм, - заўважыў кіраўнік дзяржавы. - Свет і канкурэнты не стаяць на месцы, таму трэба аб'ядноўваць намаганні".