12.06.2025

Парламенты Беларусі і Лівана падпішуць мемарандум аб узаемаразуменні

Намеснік старшыні Палаты прадстаўнікоў Вадзім Іпатаў сустрэўся са старшынёй Палаты дэпутатаў Ліванскай Рэспублікі Набіхам Беры, паведамляе БЕЛТА.

Гэтымі днямі віцэ-спікер у складзе ўрадавай дэлегацыі знаходзіцца з візітам у Бейруце. У ходзе размовы са спікерам Парламента Лівана было адзначана, што ў нашай краіне надаюць вялікае значэнне развіццю традыцыйна дружалюбных адносін з Ліванам, які з'яўляецца адным з важных партнёраў Беларусі на Блізкім Усходзе.

"Мы зацікаўлены ў пашырэнні палітычных, эканамічных і гуманітарных сувязей паміж Мінскам і Бейрутам, што адпавядае інтарэсам народаў абедзвюх дзяржаў. Беларускія дэпутаты прыхільны да ўмацавання сувязей з Ліванам на такіх пляцоўках, як Міжпарламенцкі саюз, і на двухбаковай аснове", - адзначыў Вадзім Іпатаў.

Для актывізацыі міжпарламенцкага ўзаемадзеяння намеснік старшыні Палаты прадстаўнікоў прапанаваў разгледзець пытанне аб падпісанні мемарандума аб узаемаразуменні паміж парламентамі абедзвюх краін і аднавіць работу дэпутацкіх груп дружбы.

"Мы дамовіліся аб прапрацоўцы прававых асноў нашага ўзаемадзеяння. У прыватнасці, размова ішла аб тым, каб падрыхтаваць і ў далейшым заключыць мемарандум аб узаемаразуменні. Гэта як дарожная карта: як у далейшым наш дэпутацкі корпус і дэпутацкі корпус парламента Ліванскай Рэспублікі будзе будаваць узаемаадносіны, якія даюць магчымасць узмацніць узаемадзеянне ў эканоміцы і іншых сферах", - падкрэсліў Вадзім Іпатаў.

Гаворачы аб значным патэнцыяле для паспяховага развіцця гандлёва-эканамічнага супрацоўніцтва, віцэ-спікер запрасіў ліванскіх бізнесменаў да ўдзелу ў буйных міжнародных выставачных і кангрэсных мерапрыемстваў у нашай краіне.

На заканчэнне сустрэчы старшыні Палаты дэпутатаў Ліванскай Рэспублікі Набіху Беры перададзена запрашэнне наведаць Беларусь на чале парламенцкай дэлегацыі з афіцыйным візітам.

БелТА