28.05.2021

Нацплан па развіцці зялёнай эканомікі ў Беларусі вынесены на абмеркаванне

Праект пастановы Савета Міністраў "Аб зацвярджэнні Нацыянальнага плана дзеянняў па развіцці зялёнай эканомікі ў Рэспубліцы Беларусь на 2021-2025 гады" вынесены на грамадскае абмеркаванне, паведамляе БЕЛТА са спасылкай на Нацыянальны прававы інтэрнэт-партал.

З улікам сацыяльна-эканамічных умоў, перспектыў, мэтазгоднасці і міжнародных абавязацельстваў у нацыянальны план прапануецца ўключыць мерапрыемствы, якія прадугледжваюць укараненне прынцыпаў устойлівага спажывання і вытворчасці, развіццё сферы зялёнага фінансавання, эканомікі замкнутага цыкла (цыркулярнай эканомікі), арганічнай сельскай гаспадаркі, экалагічнага турызму (устойлівага турызму), нізкавугляроднай энергетыкі, электратранспарту (інфраструктуры) і гарадской мабільнасці. Гэтыя мерапрыемствы прадугледжваюць фарміраванне разумных і энергаэфектыўных, зялёных гарадоў, змякчэнне наступстваў змянення клімату і адаптацыю да кліматычных змяненняў, а таксама захаванне і ўстойлівае выкарыстанне біялагічнай і ландшафтнай разнастайнасці. Плануецца правядзенне інфармацыйных і адукацыйных мерапрыемстваў, навуковае забеспячэнне пераходу да зялёнай эканомікі.

У абгрунтаванні прыняцця дакумента гаворыцца, што праект пастановы адпавядае нацыянальнай стратэгіі ўстойлівага развіцця на перыяд да 2035 года і асноўным напрамкам сацыяльна-эканамічнага развіцця краіны.

Арганізатар грамадскага абмеркавання - Міністэрства прыродных рэсурсаў і аховы навакольнага асяроддзя.

Свае заўвагі і прапановы можна выказаць у спецыяльнай тэме на Прававым форуме Беларусі або накіраваць арганізатару грамадскага абмеркавання з 27 мая па 6 чэрвеня ўключна на электронны адрас: an_work@minpriroda.gov.by.

БелТА