11.05.2023

Марыніч: прадстаўнікі ўзбекскага народа плячо ў плячо з беларусамі кавалі Вялікую Перамогу

 Надзвычайны і Паўнамоцны Пасол Рэспублікі Беларусь ва Узбекістане Леанід Марыніч і супрацоўнікі пасольства прынялі ўдзел ва ўрачыстай цырымоніі адкрыцця фотавыставы архіўных дакументаў на тэму: "Памяць - вечная, чалавечая каштоўнасць - свяшчэнная", якая прайшла ў Дзяржаўным музеі гісторыі Узбекістана. Аб гэтым карэспандэнту БЕЛТА расказалі ў беларускай загранустанове ў Ташкенце.

Экспазіцыя прысвечана ўкладу народа Узбекістана ў перамогу ў Другой сусветнай вайне і прымеркавана да 78-годдзя Перамогі ў Вялікай Айчыннай вайне і адзначаемай ва Узбекістане 9 мая памятнай даце - Дню памяці і ўшанавання. На палях выставы дырэктар агенцтва "Узархіў" Рэспублікі Узбекістан Улугбек Юсупаў прэзентаваў праект - кнігу-альбом "Салдацкія пісьмы", у якую ўвайшлі пісьмы, дакументы і фатаграфіі часоў Другой сусветнай вайны, якія захоўваюцца ў архівах Узбекістана.

У сваім выступленні Леанід Марыніч адзначыў уклад прадстаўнікоў узбекскага народа, якія плячо ў плячо з беларусамі і прадстаўнікамі іншых нацыянальнасцей кавалі перамогу на франтах Вялікай Айчыннай вайны і цаною жыцця і здароўя прынеслі свабоду і незалежнасць нашай Радзіме. Ён таксама звярнуў увагу на важны ўклад узбекскіх працаўнікоў тылу, якія забяспечвалі фронт усім неабходным, а таксама гасцінна расчынілі дзверы для соцень тысяч людзей, якія знаходзіліся ва Узбекістане ў эвакуацыі.

Пасол Беларусі таксама выказаў удзячнасць кіраўніцтву "Узархіва" за важны ўклад у захаванне гістарычнай памяці.

У мерапрыемстве прынялі ўдзел прадстаўнікі дзяржаўных органаў Рэспублікі Узбекістан, дыпкорпусы, ветэраны, а таксама маладзёжныя арганізацыі і школьнікі.