04.08.2022

Беларусь плануе пастаўляць мучныя і шакаладныя кандытарскія вырабы ў Кітай

Беларусь плануе пастаўляць мучныя і шакаладныя кандытарскія вырабы ў Кітай, паведамілі БЕЛТА ў прэс-службе канцэрна "Белдзяржхарчпрам".

У "Белдзяржхарчпраме" адбылася дзелавая сустрэча з дэлегацыяй КНР на чале з галоўным выканаўчым дырэктарам кітайскай кампаніі UJU Holding Ltd. Пэн Лянам. Удзельнікі сустрэчы разгледзелі перспектыўныя варыянты супрацоўніцтва і патэнцыял паставак прадукцыі прадпрыемстваў канцэрна ў Кітай для продажу ў Нацыянальным павільёне Беларусі на платформе электроннай камерцыі JD.сom і ў сацыяльнай сетцы DouYin.

Бакі абмеркавалі магчымасці экспарту беларускіх мучных і шакаладных кандытарскіх вырабаў, алкагольнай прадукцыі і піва. Ужо ў бліжэйшы час галоўны выканаўчы дырэктар UJU Holding Ltd. плануе наведаць СП ААТ "Спартак", ААТ "Гомельскі тлушчавы камбінат", ААТ "Чырвоны харчавік", ААТ "Машхарчпрад".

БелТА