01.07.2020

Беларусь і Цюменская вобласць дамовіліся развіваць супрацоўніцтва ў прамысловасці

Перспектывы пашырэння ўзаемавыгаднага партнёрства ў розных сферах прамысловасці былі абмеркаваны сёння на пасяджэнні рабочай групы па гандлёва-эканамічным і навукова-тэхнічным супрацоўніцтве паміж Беларуссю і Цюменскай вобласцю Расіі, паведамілі БЕЛТА ў прэс-службе Міністэрства энергетыкі.

Пасяджэнне прайшло ў фармаце відэа-канферэнц-сувязі пад старшынствам кіраўнікоў групы - намесніка міністра энергетыкі Беларусі Вадзіма Закрэўскага і намесніка губернатара Цюменскай вобласці Уладзіміра Чайметава.

У прыватнасці, беларускі бок прапанаваў прадметна абмеркаваць магчымасці нарошчвання паставак у Цюменскую вобласць пасажырскага транспарту. "У нас ёсць прапановы па гарадскім транспарце, у тым ліку нашых сучасных электробусах, думаю, яны будуць вам цікавы. Можам арганізаваць гэтыя пастаўкі на льготных умовах з улікам фінансавых праграм крэдытавання і падтрымкі экспарту, якія ёсць як у Беларусі, так і ў Расіі", - адзначыў Вадзім Закрэўскі. Беларусь таксама гатова забяспечыць патрэбнасці Цюменскай вобласці ў грузавой, сельскагаспадарчай, дарожна-будаўнічай і камунальнай тэхніцы.

Яшчэ адзін перспектыўны напрамак узаемадзеяння - здабыча і перапрацоўка торфу. "НДІ Белгіпрапалівагаз" гатовы правесці работу па актуалізацыі запасаў разведаных радовішчаў торфу ў Цюменскай вобласці для наступнай распрацоўкі тэхніка-эканамічных абгрунтаванняў інвестыцыйных праектаў. Бакі дамовіліся падрыхтаваць адпаведны план дзеянняў.

Размова таксама ішла аб супрацоўніцтве ў галіне лёгкай прамысловасці, аграпрамысловага комплексу, будаўніцтва, лясной гаспадаркі. Акрамя таго, расійскі бок прапанаваў прапрацаваць магчымыя варыянты ўзаемадзеяння ў сферы IT-тэхналогій.

З 80 рэгіёнаў Расіі, з якімі ў Беларусі ўстаноўлена гандлёва-эканамічнае супрацоўніцтва, Цюменская вобласць займае першае месца па тавараабароце. У першым квартале 2020 года аб'ём узаемнага гандлю вырас на 16,4 працэнта ў параўнанні з аналагічным перыядам мінулага года. Бакі пацвердзілі ўзаемнае імкненне захаваць і ўмацаваць існуючую пазітыўную дынаміку.