20.05.2025

Беларусь і Аман стварылі сумесны камітэт па супрацоўніцтве і інвестыцыях

Беларусь і Аман 19 мая падпісалі міжурадавае пагадненне аб стварэнні сумеснага камітэта па супрацоўніцтве і інвестыцыях, перадае карэспандэнт БЕЛТА.

Подпісы пад дакументам паставілі міністр замежных спраў Максім Рыжанкоў і прэзідэнт Аманскага інвестыцыйнага агенцтва Абдэльсалам Махамед аль-Муршыдзі. Яны і сталі сустаршынямі сумеснага камітэта.

На цырымоніі таксама прысутнічаў наследны прынц - міністр культуры, моладзі і спорту Султаната Аман Зеязін бен Хайтам Аль Саід. Гэта першы візіт аманскага наследніка ў Беларусь, яму і даручана каардынацыя двухбаковага супрацоўніцтва з аманскага боку.

Перад падпісаннем пагаднення ў Палацы Незалежнасці адбылася сустрэча Прэзідэнта Беларусі Аляксандра Лукашэнкі з Зеязінам бен Хайтамам Аль Саідам. Кіраўнік дзяржавы падкрэсліў, што перш за ўсё бакі працуюць над пытаннямі гандлёва-эканамічнага супрацоўніцтва. Для Беларусі асаблівую цікавасць уяўляе выкарыстанне партовай інфраструктуры Амана, каб сумесна развіваць гандаль і з іншымі краінамі, уключаючы Афрыку.

"У Беларусі ёсць шмат таго, што сёння цікавіць аманскі бок. Вы нам вельмі цікавыя па многіх напрамках. Гэта і адпачынак нашых людзей, сельская гаспадарка, пастаўка прадукцыі. І самае галоўнае, вашы парты, праз якія мы можам працаваць у рэгіёне", - сказаў беларускі лідар.

Адносіны паміж дзвюма краінамі актывізаваліся пасля візіту Прэзідэнта Беларусі ў Аман у снежні 2024 года. Тады прадстаўнікі абодвух урадаў падпісалі дакументы аб супрацоўніцтве і адпрацавалі дарожныя карты па галінах.

Акрамя таго, на палях візіту за рамкамі сустрэч на вышэйшым узроўні адбылося вельмі шмат кансультацый і перагавораў на ўзроўні міністраў - кіраўнікоў МЗС, Мінпрама і Мінсельгасхарча. Бакі адпрацавалі механізмы выбудоўвання супрацоўніцтва і сумесныя праекты, а таксама сышліся на думцы аб неабходнасці больш хуткага заснавання міжурадавай камісіі па гандлёва-эканамічным супрацоўніцтве.

Раней міністр замежных спраў Максім Рыжанкоў адзначаў, што Аман важны для Беларусі з пункту гледжання стварэння хаба для пастаўкі прадукцыі не толькі на мясцовы рынак, але і ў іншыя краіны рэгіёна, улічваючы вельмі шырокія кантакты і тысячагадовы вопыт работы аманцаў на рынках дзяржаў Афрыкі, Індыі і іншых краін.

БелТА