21.10.2024

Адзіны дзень азелянення пройдзе ў Беларусі 19 кастрычніка

Адзіны дзень азелянення пройдзе ў Беларусі 19 кастрычніка, паведамілі БЕЛТА ў прэс-службе Міністэрства прыродных рэсурсаў і аховы навакольнага асяроддзя.

Плануецца пасадка больш як 60 тыс. дрэў і кустоў. Будуць высаджаны ліпы, клёны, дубы, рабіны, грабы, хвоі, вербы, арэхі, каштаны, ясені, бэз, спірэя, пузыраплоднік, фарзіцыя і інш.

Адзіны дзень азелянення - адно з мерапрыемстваў акцыі "Разам для зялёнай Беларусі!", прымеркаванай да Года якасці. Расліннасць аказвае станоўчы ўплыў на клімат, вадаёмы, жывёльны свет і іншыя элементы біясферы, з якімі яна цесна ўзаемазвязана. Зялёныя насаджэнні патрэбны не толькі для прыгажосці. Яны зніжаюць узровень гарадскога шуму, загазаванасць, абагачаюць паветра кіслародам, служаць абаронай і асяроддзем пражывання для жывёл.

Спрыяльным часам для выканання пасадак з'яўляецца вясенне-асенні перыяд: восенню - калі дрэва ўжо скінула з сябе лісце, вясной - да з'яўлення першых пупышак. Асаблівую ўвагу Мінпрыроды ўдзяляе захаванасці раслін: саджанцы патрабуюць асаблівага догляду, паліву і падкормкі. У Мінпрыроды нагадваюць, што самавольна праводзіць работы забаронена. Неабходна звярнуцца ў мясцовы выканкам, каб арганізаваць пасадкі з улікам патрабаванняў заканадаўства.

Згодна з экалагічнымі нормамі і правіламі, узровень азелянення ў гарадах павінен складаць не менш за 40 працэнтаў. Такі паказчык у рэспубліцы дасягнулі практычна ўсе населеныя пункты, а ў некаторых ён складае 60-65 працэнтаў.

"З кожным годам узровень азелянення ў рэспубліцы расце. У сярэднім штогод высаджваецца каля мільёна аб'ектаў расліннага свету, - расказалі ў прэс-службе. - У гарачы час года аб'яўляюцца дадатковыя акцыі "Палі дрэва - захавай яму жыццё".

БелТА