14.07.2025

Выдатна здаровым быць!

Выступаючы са штогадовым Пасланнем да беларускага народа і Нацыянальнага сходу 19 красавіка 2019 года, Прэзідэнт Рэспублікі Беларусь Аляксандр Лукашэнка даў даручэнне рэалізаваць дзяржаўны праект "Здаровыя гарады і пасёлкі" ва ўсіх населеных пунктах краіны.

На тэрыторыі Асіповіцкага раёна праект стартаваў у 2020 годзе пасля зацвярджэння комплекснага плана асноўных мерапрыемстваў па рэалізацыі прафілактычнага праекта "Асіповічы — здаровы горад" на 2020-2024 гады.

Зроблена за гэты перыяд нямала, і аб усіх выніках дзеянняў па дасягненню зададзенага ўзроўню па кожным з 41 устаноўленых для нашага горада крытэрыяў эфектыўнасці ў адным артыкуле не распавядзеш. Таму выбралі чатыры напрамкі, блізкіх і зразумелых кожнаму земляку.

Здароўе — гэта спорт і чыстая серада

Як паведаміла інструктар-валеолаг райЦГЭ Таццяна Перасыпкiна, у рамках рэалізацыі дзяржпраграмы ў райцэнтры на працягу 2022-2024 г. на 54,9% вырасла ўдзельная вага дваровых тэрыторый, абсталяваных комплекснымі спартыўнымі пляцоўкамі для заняткаў фізічнай культурай і спортам (устаноўлена шэсць дзіцячых гульнявых пляцовак); на 2,8% — працягласць веладарожак (з 10,276 да 10,560 км); удзельная вага азелянёнай тэрыторыі горада падтрымліваецца на ўзроўні 41,1%.

Узровень наведвальнасці фізкультурна-спартыўных збудаванняў, у тым ліку ва ўстановах адукацыі, да 2024 г. павялічыўся на 13% (86,9%). Больш чым на траціну (з 55,5% да 89,3%) узрасла доля жыхароў горада, якая надае фізічнай актыўнасці не менш за 20 хвілін у дзень.

За перыяд рэалізацыі праекта "Асіповічы — здаровы горад" адзначаецца зніжэнне колькасці насельніцтва, якое паліць. Так, калі ў 2020 годзе курыла 29,5% насельніцтва, то ў 2024 годзе — 27,8%. Сярод мужчын курцоў 39,1%, сярод жанчын 16,6%.

Вядзецца маніторынг атмасфернага паветра ў трох маніторынгавых кропках — канцэнтрацыі забруджвальных рэчываў на працягу шэрагу гадоў не перавышаюць гігіенічных нарматываў. Узровень сартавання (паасобнага збору) смецця складае 70,04%, ступень перапрацоўкі адходаў у параўнанні з 2022 г. павялічылася на 36,2%.

Пабудавана станцыя абезжалезвання на водазаборы "Паўночны", пасля чаго чыстая вада стала даступная практычна 100% насельніцтва горада.

Здароўе — гэта бяспечная і годна аплачваемая праца

Па дадзеных упраўлення па працы, занятасці і сацыяльнай абароне насельніцтва райвыканкама, у названы перыяд адзначаецца рост сярэдняй заработнай платы на 44,3%.

У пяць разоў знізіўся ўзровень рэгіструемага беспрацоўя да колькасці эканамічна актыўнага насельніцтва: 2022 год – 0,1; 2024 — 0,02%.

Для стварэння здаровых і бяспечных умоў працы работнікаў штогод праводзіцца агляд-конкурс на лепшую арганізацыю раёна па ахове працы і прафілактыцы вытворчага траўматызму.

Здароўе —гэта шчаслівае дзяцінства, актыўная старасць

Ва ўстановах адукацыі ідзе рэалізацыя сучасных здароўезберагальных тэхналогій, якія забяспечваюць захаванне і ўмацаванне здароўя дзяцей і падлеткаў. Забяспечаны паўнавартасны вольны час непаўналетніх. Ва ўстановах агульнай сярэдняй адукацыі ў 2024/2025 навучальным годзе функцыянавала 201 аб'яднанне па інтарэсах, якімі былі ахоплены 2 530 навучэнцаў (49%).

З уводам у эксплуатацыю СШ №5 аўтаматычна знялося пытанне двухзменнасці ў гарадскіх школах.

Па дадзеных аддзела па адукацыі райвыканкама, узровень аздараўлення дзяцей павялічыўся ў параўнанні з 2022 годам на 7,7% (2022 — 39,0; 2023 — 38,0; 2023 — 42,0).

На базе аддзялення сацыяльнай рэабілітацыі, абілітацыі інвалідаў і дзённага знаходжання грамадзян пажылога ўзросту ўстановы "Асіповіцкі РЦСАН" для грамадзян пажылога ўзросту дзейнічае валанцёрскі гурток "Здравушка"; на базе райарганізацыі Беларускага таварыства Чырвонага Крыжа — ініцыятыўная група "Насустрач здароўю" (скандынаўская хада).

Здароўе — гэта якаснае харчаванне

ААТ "Асіповіцкі хлебазавод" вырабляе хлеб "Прыгажосць" (прызначаны для дыетычнага, прафілактычнага харчавання; хлеб збожжавы (з'яўляецца крыніцай харчовых валокнаў).

Прадукцыя ААТ "Бабушкина крынка — кіруючая кампанія холдынгу "Магілёўская малочная кампанія "Бабушкина крынка" філіял "Асіповіцкі" — цукерка малочная "Энергія малака", узбагачоная вітамінам D3, сырок тварогавы глазураваны без дадання цукру c масавай доляй тлушчу 18%

ААТ "Асіповіцкі кансервавы завод" выпускае сок яблычны адноўлены для дзіцячага харчавання без дадання цукру і кансервантаў, сокі фруктовыя адноўленыя без утрымання цукру, соус таматавы "Казка" для дзіцячага харчавання.

Самае важнае ў дзяржаўным прафілактычным праекце "Здаровыя гарады і пасёлкі" тое, што ён не з'яўляецца разавай акцыяй, а працягваецца паслядоўна — арыентуючыся на дасягненне ўсё больш высокіх мэтаў. І гэта выдатна: здароўя шмат не бывае!

osipovichi-region.by