08.12.2025

Юныя асіпаўчане сабралі калекцыю ўзнагарод на прэстыжных творчых конкурсах

Вялікую калекцыю ўзнагарод з Рэспубліканскага фестывалю-конкурсу Dance Power прывёз народны ансамбль эстраднага танца "Капрыз" раённага Цэнтра культуры і вольнага часу.

Калектыў забраў золата (ва ўзроставай катэгорыі 9-11 гадоў) і срэбра (12-15 гадоў) у намінацыі "Эстрадны танец". Узнагароду вышэйшай пробы ў гэтай намінацыі атрымала і падрыхтоўчая група малых. Спецыяльнага прыза "Зорка фестывалю" ўдастоены Максім Надзеевец, а група бацькоў і сяброў выхаванцаў адзначана спецыяльным прызам "Лепшая група падтрымкі".

- Фестываль стаў сапраўднай арэнай творчага спаборніцтва, у якім кожны ўдзельнік калектыву змог праявіць сябе, паказаць сілу духу і бязмежную любоў да танца, - дзеліцца ўражаннямі кіраўнік ансамбля Крысціна Камнева.

Канец восені парадаваў новымі перамогамі і дзіцячыя школы мастацтваў.

Навучэнка ДШМ № 2 Надзея Стукарчук стала дыпламантам І ступені Міжнароднай алімпіяды па сальфеджыа “Тоніка”.

"Залатую" ацэнку атрымала і выступленне выхаванца філіяла школы ў рабочым пасёлку Татарка Ціхана Патупчыка. Юны цымбаліст прадставіў на суд журы ІІІ Міжнароднага конкурсу "Гонар краіны" кампазіцыю "Адажыо" нарвежскага кампазітара Рольфа Лоўланда.

Паспяхова выступілі на V адкрытым рэспубліканскім конкурсе вакальна-харавога мастацтва "Хрустальны голас" навучэнцы ДШМ № 1. Лаўрэатамі І ступені сталі Анастасія Капейкіна, Макс Карытка, Кірыл Альфяровіч і Ева Карытка. Другое месца заняла Сафія Куцечка, бронзу заваявалі Паліна Балтушка і Варвара Шынкарова.

Пакарыўся асіповіцкім вакалістам і адкрыты рэгіянальны конкурс дзіцячай творчасці "ЛАДушкі", які прайшоў на базе Магілёўскай дзіцячай школы мастацтваў № 6. Паводле яго вынікаў Дыпломам І ступені ўзнагароджана Кіра Шытава. Другое месца падзялілі Міраслава Шчэрба і Вера Рабічэнка, трэцяе - Ангеліна Новікава і Аліса Муха. Дыпломамі ІІІ ступені ўзнагароджаны і вакальны ансамбль "Містэрыя талентаў" пад кіраўніцтвам Аксаны Мысюцінай.