08.07.2025

У Асіповічах прайшоў міжнародны літаратурна-музычны фестываль

5 ліпеня наш горад стаў эпіцэнтрам маштабнай культурнай падзеі — VIІІ Міжнароднага літаратурна-музычнага фестывалю нацыянальных культур Расіі і Беларусі "Сузор'е-2025".

Канцэртная зала раённага цэнтра культуры і вольнага часу прыняла 32 фіналісты, якія прадстаўлялі лепшыя творчыя сілы брацкіх краін.

Дэлегацыю Расійскай Федэрацыі першым сустрэў раённы гісторыка-краязнаўчы музей, дзе прайшла прэзентацыя калектыўнага зборніка "Літаратурны радок". Таксама госці змаглі пазнаёміцца з багатай гісторыяй і культурай Асіповіцкага краю, наведаўшы экспазіцыю музея. Далей удзельнікаў фестывалю сустракаў Цэнтр культуры і вольнага часу. Традыцыйнымі хлебам-соллю і забіяцкімі песнямі парадаваў служыцеляў Музы заслужаны аматарскі калектыў народны ансамбль народнай песні і музыкі "Дзівакі".

Конкурсная праграма пачалася апоўдні. Адкрыла фестываль галоўны спецыяліст аддзела культуры райвыканкама Алена Бондарава. Яна зачытала прывітальны адрас кіраўніцтва раёна і ўручыла падзячны ліст кіраўніку адміністрацыі Еланскага муніцыпальнага раёна Валгаградскай вобласці Расіі Аляксею Голеву. Цёплымі і пранікнёнымі былі словы настаяцеля храма ў гонар патрыярха Ціхана протаіерэя, благачыннага Волжскай акругі Калачоўскай епархіі Валгаградскай вобласці Аляксандра Капейкіна. Айцец Аляксандр адзначыў важнасць падобных мерапрыемстваў, падзякаваў арганізатарам фестывалю і блаславіў канкурсантаў.

Ацэньвала прадстаўленыя работы аўтарытэтнае журы на чале з заслужаным дзеячам культуры Рэспублікі Беларусь, членам прэзідыума і членам савета Саюза пісьменнікаў Беларусі, Саюза пісьменнікаў Саюзнай дзяржавы, старшынёй Мінскага гарадскога аддзялення Саюза пісьменнікаў Беларусі Міхаілам Пазняковым. Выбар лепшых з мноства таленавітых удзельнікаў апынуўся няпростай задачай. Аднак журы справілася з гэтай адказнай місіяй і вызначыла самых яркіх зорак "Сузор'я-2025".

У намінацыі "Паэзія" першае месца падзялілі асіпаўчанка Людміла Піскун і Наталля Літвінава з Полацка. Золата ў "Прозе" забраў расiянiн Павел Усаў з горада Данкоў Ліпецкай вобласці. Намінацыя "Выканаўца народнай песні" скарылася сталічнаму вакальна-харавому ансамблю інтэрнацыянальнай музыкі "Прамень" установы культуры змешанага тыпу "Рэспубліканскі цэнтр нацыянальных культур" і яго ўдзельніцы Наталлі Папковай. Пераможцам у намінацыі "Дэкламацыя" стала наша зямлячка Леля Багдановіч, а лепшымі аўтарамі-выканаўцамі літаратурнага твора Канстанцін Цыбульскі з аг. Ждановічы Мінскай вобласці і расіянка Наталля Капейкіна з г. Волжскага Валгаградскай вобласці.

Гран-пры фестывалю аднадушна прысудзілі жыхарцы горада Ваўкавыска Гродзенскай вобласці Галіне Шевяленка.

Яе песня "Партызанскі сувязны", прысвечаная дзядулю Івану Шевяленка, на думку журы, адрозніваецца глыбінёй думкі, майстэрствам складу і эмацыйным уздзеяннем на слухача.

- Народная, культурная і творчая дыпламатыя робіць вялікую справу, — адзначыў Міхаіл Пазнякоў. - Яна збліжае сэрцы людзей, літаратуру, культуру розных краін і народаў. Такімі мерапрыемствамі мы ўмацоўваем нашу Беларусь і Саюзную дзяржаву.

Знакавым гэты дзень стаў і для расійскага пісьменніка, сапраўднага члена Пятроўскай акадэміі навук і мастацтваў, старшынi праўлення Саюза пісьменнікаў "Воінская садружнасць" Валянціна Баюканскага. З рук Міхаіла Паўлавіча ён атрымаў членскі білет Саюза пісьменнікаў Беларусі.

Фестываль "Сузор'е-2025", арганізаваны паэткамі Тамарай Кавальчук і Наталляй Адлер, стаў яркай падзеяй культурнага жыцця дзвюх краін, не толькі прадэманстраваўшы багацце талентаў, але і паслужыўшы ўмацаванню сяброўскіх сувязяў і ўзаемаразуменню паміж народамі.

osipovichi-region.by