13.08.2025

У Асіповічах пачынаецца фарміраванне велаінфраструктуры

Мясцовыя камунальнікі шмат робяць для таго, каб, улічваючы патрэбы часу, наш горад набываў усё больш прывабны і годны выгляд. А інфраструктуру любога сучаснага горада цяпер немагчыма ўявіць без веладарожак.

І хоць колькасць аўтамабіляў у горадзе з кожным годам расце, не змяншаецца і супольнасць аматараў двухколавага транспарту. Веласiпеды, як вядома, выбіраюць прыхільнікі здаровага ладу жыцця. Выкарыстанне гэтага сродку перамяшчэння таксама садзейнічае эканоміі сродкаў уладальнікаў. Да таго ж веласiпед - экалагічны і зручны спосаб перамяшчэння.

Надышоў час стварыць і ў нашым горадзе веладарожкі. Пакуль іх устанаўліваецца дзве - на вуліцах Першамайскай (ад Інтэрнацыянальнай да Каралёва) і 60 гадоў Кастрычніка (ад ЗТАА "Дахавы завод ТэхнаНIКОЛЬ" да вуліцы Сумчанкі). Месцы выбіраліся з улікам тэхнічных патрабаванняў: большасць транспартных артэрый не мае патрэбных габарытаў. А яшчэ і з мэтай эканоміі сродкаў: абедзве веладарожкі ўсталёўваюцца паралельна з уладкаваннем тратуараў на гэтых вуліцах. Першамайская, акрамя таго, будзе яшчэ і асфальтавацца, таму ўсё запланаванае патрабуе працяглага часу. Але першыя крокі ўжо зроблены, і паступова веласіпедысты будуць атрымліваць усё больш тэрыторый, дзе можна бяспечна, не замінаючы астатнім удзельнікам дарожнага руху, катацца на любімым транспартным сродку.

osipovichi-region.by