21.08.2025

Сёлета ў Асіповічах пачалася рэканструкцыя гарадскіх ачышчальных збудаванняў

Штодня землякі зліваюць у каналізацыю тоны вадкасці, якую трэба ачысціць ад арганічных, мінеральных і біялагічных забруджванняў. Сцёкі паступаюць з жылых дамоў і вытворчых памяшканняў, ад прадпрыемстваў і арганізацый. Усё змесціва iдзе на гарадскія ачышчальныя збудаванні, прызначаныя для ачысткі сцёкавых вод да ўстаноўленых нарматыўных паказчыкаў і далейшага скіду іх у вадаёмы.

Зараз за суткі праз ачышчальныя збудаванні магутнасцю 15 тысяч кубаметраў праходзіць ад сямі да дзесяці тысяч кубоў вадкасці.

Нягледзячы на няпоўную загрузку, ачышчальныя збудаванні з часам састарэлі і яшчэ ў АДУКПП "Водаканал" абмяркоўвалася пытанне іх рэканструкцыі. Нейкія крокі ў гэтым кірунку рабіліся. Напрыклад, быў узведзены будынак рашотак, пескалоўкі і новы латок, але з-за адсутнасці фінансавання і далейшай аптымізацыі на прадпрыемстве работы былі прыпыненыя.

І вось цяпер настаў час правесці глабальную рэканструкцыю. Трэба будзе не толькі замяніць усё адпрацаваўшае свой тэрмін абсталяванне на новае, але і ўдасканаліць тэхналогію апрацоўкі сцёкаў, перапланаваць тэрыторыю, а заадно і правесці рамонт адміністрацыйнага будынка.

Работы разлічаны на два гады і будуць праходзіць у тры этапы. Займаецца імі падрадная арганізацыя з Мінска, якая спецыялізуецца на будаўніцтве і мадэрнізацыі падобных аб'ектаў, — ТАА "Катрон".

Пакуль ідзе закладка сістэмы ачысткі. На будаўнічай пляцоўцы працуюць два краны, чатыры пагрузчыкі, тры самазвалы і каля 30 рабочых розных спецыяльнасцяў.

Начальнік ачышчальных збудаванняў Аляксандр Канайко, распавядаючы аб існуючай сістэме ачысткі, адзначае, што спачатку ажыццяўляецца механічная, а затым біялагічная ачыстка сцёкавых вод. Вадкасць iдзе праз цэлы ланцужок звязаных паміж сабой рэзервуараў і рознага абсталявання: прасоўваецца па латку, працаджваецца праз сетку, праходзіць праз пескалоўкі, трапляе ў аэраценкі з актыўным глеем. Актыўны глей выкарыстоўваецца для біялагічнай ачысткі. Ён цыркулюе па крузе і дапамагае выдаліць арганічныя рэчывы з вадкасці, уключаючы злучэнні азоту і фосфару. Глей пастаянна аднаўляецца з дапамогай аэрацыі, каб яго канцэнтрацыя падтрымлівалася на патрэбным узроўні.

У бліжэйшы час будзе цалкам мяняцца помпавая станцыя: месца старых помпаў зоймуць новыя, энергазберагальныя.

Акрамя таго, устаноўлены новыя паветранадзімалкі, а яшчэ — новая аэрацыя для актыўнага глею, хутка будзе праведзена замена пясковых бункераў на жалезабетонныя пляцоўкі адкрытага тыпу. Плануецца, што пасля рэканструкцыі ачыстка будзе ажыццяўляцца ў аўтаматычным рэжыме, а самі ачышчальныя збудаванні пяройдуць на электраэнергію.

Таксама ўладкоўваецца новая прасторная аператарская, а былыя складскія памяшканні будуць пераабсталяваны ў пакоі прыёму ежы і бытавыя памяшканні — робіцца ўсё для камфорту абслугоўваючага персаналу. За непатрэбнасцю трэба будзе дэмантаваць ёмістасці, у якія раней паступалі вадкія адходы з дахавага завода ТэхнаНIКОЛЬ: цяпер прадпрыемства мае ўласныя ачышчальныя збудаванні.

Увогуле, работы яшчэ будзе шмат. Плануецца, што да пачатку 2027 года наш горад атрымае новыя сучасныя ачышчальныя збудаванні, што дасць магчымасць павысіць эфектыўнасць ачысткі сцёкавых вод, знізіць выдаткі на эксплуатацыю і абслугоўванне, прывесці аб'ект у адпаведнасць сучасным экалагічным стандартам і стварыць магчымасць апрацоўкі вялікіх аб'ёмаў сцёкаў і памяншэння шкодных выкідаў.

osipovichi-region.by