10.10.2025

У Ялізаўскай бальніцы — новы медыцынскі аўтамабіль

Дзякуючы праекту "Даступная меддапамога з Беларусбанкам" аўтапарк ЦРБ папоўніўся сучасным спецыяльна абсталяваным медаўтамабілем — днямі ён заступіў на дзяжурства ва ўчастковай бальніцы рабочага пасёлка Ялізава.

Месца пастаяннай прапіскі "неадкладкі" вызначана заканамерна: дапамагчы мясцовай участковай бальніцы, якая абслугоўвае рабочы пасёлак і 16 вёсак, ялізаўчане папрасілі старшыню праўлення Беларусбанка, намесніка старшыні пастаяннай камісіі па эканоміцы, бюджэце і фінансах Савета Рэспублікі Нацыянальнага сходу Рэспублікі Беларусь Віктара Ананіча, які сустракаўся з жыхарамі рабочага пасёлка падчас наведвання рэгіёнаў.

Неўзабаве Віктар Ананіч звярнуўся да кіраўніцтва Міністэрства аховы здароўя і ТАА "Завод аўтамабільных прычэпаў і кузаваў "МАЗ-Купава" — так з'явіўся сацыяльна значны праект "Даступная меддапамога з Беларусбанкам", у аснову якога лёг у тым ліку і канкрэтны запыт ялізаўчан.

Урачыстае ўручэнне ключоў ад 12 сучасных медыцынскіх аўтамабіляў установам аховы здароўя розных рэгіёнаў краіны, адным з якіх стала Асіповіцкая ЦРБ, адбылося напярэдадні Дня адзінства, што сімвалічна: адзінства — гэта ў тым ліку і сумесная работа на карысць простых людзей прадстаўнікоў розных сфер дзейнасці — ад фінансавых да сацыяльных.

- Раней, каб дастаўляць пацыентаў, асабліва маламабільных, з Ялізава ў нашу ЦРБ для аказання спецыялізаванай дапамогі, нярэдка даводзілася выклікаць хуткую дапамогу з райцэнтра, а гэта 30 кіламетраў язды, — распавёў галоўны ўрач ЦРБ Павел Шаціла. — Цяпер праблемы няма: спецыяльны аўтамабіль "Медслужба" на базе "Лады Ларгус" укамплектаваны ўсім неабходным, ён камфортны і функцыянальны, прызначаны як для перавозкі медперсаналу для абслугоўвання пацыентаў на даму, так і для дастаўкі хворых, у тым ліку ляжачых, у медустанову або з яе. Новая машына ўжо працуе на карысць здароўя 3 600 чалавек, якія знаходзяцца на абслугоўванні Ялізаўскай участковай бальніцы.

Своечасовая медыцына ў кожным, нават самым аддаленым кутку краіны — на гэтым не раз акцэнтаваў увагу Кіраўнік дзяржавы, і гэты стратэгічны курс, як бачым, знаходзіць рэальнае ўвасабленне ў сацыяльных праектах, такіх як "Даступная меддапамога з Беларусбанкам".

Адзначу таксама, што гэта не першы для рабочага пасёлка праект, які, несумненна, дабратворна адаб'ецца на здароўі жыхароў: у ліпені мінулага года ў населеным пункце ў рамках дзяржпраекта "Здаровыя гарады і пасёлкі" стартаваў прафілактычны праект "Ялізава — здаровы пасёлак", які будзе рэалізоўвацца да 2028 года.