03.12.2025

Упэўнена гледзячы наперад

У мінулую пятніцу ў Магілёве дэлегаты VII Усебеларускага народнага сходу ад Магілёўскай вобласці абмеркавалі праект Праграмы сацыяльна-эканамічнага развіцця нашай краіны на 2026-2030 гг.

Намеснік міністра эканомікі Беларусі Алена Балігатава, прадстаўляючы праект Праграмы, адзначыла, што ў яе аснову леглі фундаментальныя прынцыпы і стратэгічныя арыенціры, якія неаднаразова падкрэсліваліся Кіраўніком дзяржавы. Гэта:

- нацыянальная дэмаграфічная бяспека - захаванне насельніцтва, умацаванне здароўя нацыі і падтрымка сям'і;

- развіццё чалавечага патэнцыялу, якасная адукацыя, выхаванне гарманічнай і патрыятычнай асобы;

- стварэнне якаснага і зручнага асяроддзя для жыцця;

- рост канкурэнтаздольнасці, паскарэнне тэхналагічнага развіцця і лічбавая трансфармацыя;

- моцныя рэгіёны;

- умацаванне абараназдольнасці дзяржавы і развіццё абароннага сектара эканомікі;

- рэалізацыя турыстычнага патэнцыялу.

Кожны прыярытэт напоўнены канкрэтнымі задачамі. Яны, у сваю чаргу, аблічбаваныя праз сістэму якасных індыкатараў для адзнакі рэзультатыўнасці.

Як адзначыла Алена Балігатава, Праграма заснавана на аналітычных даследаваннях, маштабных сацыялагічных апытаннях, праведзеных БІСД, а таксама ўліку запытаў грамадства і найбольш актуальных зваротаў грамадзян. У ёй улічаны пытанні, якія паступілі ад дэлегатаў Усебеларускага народнага сходу, у ліку якіх былі звароты з Магілёўскай вобласці, якія датычацца самых надзённых тэм.

Дэлегаты VII Усебеларускага народнага сходу ад Магілёўскай вобласці ўнеслі шэраг прапаноў, якія могуць зрабіць Праграму развіцця краіны найбольш эфектыўнай.

Асноўны акцэнт на развіцці турызму, арэнднага жылля, цыфравізацыі адміністрацыйных працэдур.

У склад дэлегацыі Асіповіцкага раёна ўвайшлі дэлегаты УНС старшыня райвыканкама Геворг Мелканян, начальнік АРЭС Алег Курганскі, інжынер па ахове навакольнага асяроддзя філіяла "Асіповіцкі" ААТ "Бабушкина крынка" Надзея Мельнік, ветэран Узброеных Сіл палкоўнік запасу Аляксей Ратушны, а таксама старшыня райвыканкама Сяргей Ананіч, намеснік старшыні райвыканкама Ганна Землянухіна.

Меркаваннем аб выніках сходу дэлегатаў VII Усебеларускага народнага сходу ад Магілёўскай вобласці падзяліліся:

Геворг Мелканян:

- Праграма развіцця нашай краіны ў цэлым на 2026-2030 гады прапрацавана дэталёва. Зроблены вывады з цяжкасцей, якія прыйшлося пераадольваць у папярэдняй пяцігодцы, вызначаны аспекты, на якіх трэба засяродзіць увагу. Прапанаваны дакладныя рашэнні, распрацаваны планы дзеянняў па ўсіх напрамках. Таму мэта праграмы - пераход да новай якасці жыцця кожнага беларуса - зразумелая, рэальная і дасягальная.

Беларусь павінна стаць краінай з развітой лічбавай індустрыяй і тэхналагічнай структурай, уласнымі прарыўнымі тэхналогіямі.

Вельмі важна, што адным з прыярытэтаў праграмы развіцця краіны з'яўляецца стварэнне моцных рэгіёнаў, усебаковая рэалізацыя іх патэнцыялу.

Напрыклад, у нашым раёне будзе рэалізаваны інвестыцыйны праект па стварэнні вытворчасці дакладнага алюмініевага ліцця. Гэтая інавацыйная вытворчасць, якая значна пашырыць магчымасці Асіповіцкага завода аўтамабільных агрэгатаў — аднаго з флагманаў рэгіянальнай індустрыі.

Надзея Мельнік:

— Да гэтага часу Праграма сацыяльна-эканамічнага развіцця краіны не зацвярджалася вышэйшым прадстаўнічым органам народаўладдзя. Гэта падкрэслівае асаблівую значнасць дакумента, закліканага задаць вектар развіцця Беларусі на наступныя пяць гадоў.

Асаблiвай увагі заслугоўвае і сам працэс падрыхтоўкі Праграмы: ён вёўся з актыўным улікам меркаванняў грамадзян. Так, Беларускі інстытут стратэгічных даследаванняў сумесна са штабам патрыятычных сіл краіны арганізаваў агульнанацыянальны экспертны дыялог пад назвай "Вобраз будучыні Беларусі".

У рамках праекта "Народная пяцігодка" кожны жадаючы мог не толькі прайсці апытанне, але і накіраваць свае прапановы, пажаданні і ініцыятывы па стратэгічнаму развіццю дзяржавы.

Аляксей Ратушны:

— Асноўная мэта Праграмы на будучую пяцігодку - забяспечыць пераход да новай, больш высокай якасці жыцця кожнага жыхара Беларусі. Галоўным прыярытэтам застаецца чалавек.

На перыяд 2026-2030 гадоў вызначаны сем стратэгічных напрамкаў развіцця. Кожны з іх уключае дакладна сфармуляваныя задачы, паслядоўнае выкананне якіх павінна прывесці да адчувальнага паляпшэння ўзроўню і якасці жыцця грамадзян.

Але для мяне, як вайсковага чалавека, галоўным прыярытэтам застаюцца пытанні абароны нашай Радзімы. Цешыць, што ім у Праграме развіцця краіны нададзена належная ўвага.

Алег Курганскі:

— Праграма сацыяльна-эканамічнага развіцця Рэспублікі Беларусь на 2026-2030 гады ўлічвае дасягненні мінулых гадоў, грунтуецца на аналізе перспектыў сучаснага развіцця, выяўленні актуальных праблем і накіравана на іх вырашэнне.

Беларусь падчас яе рэалізацыі павінна стаць краінай з развітой лічбавай індустрыяй і тэхналагічнай структурай, уласнымі прарыўнымі тэхналогіямі.