18.07.2025

Ураджэнец вёскі Зборск Асіповіцкага раёна Міхаіл Фёдараў перадаў мясцовым жыхарам абраз святых Касмы і Даміяна Рымскіх

Храм у іх гонар існаваў на гэтых землях з 1826 па 1960 гады.

14 ліпеня для жыхароў Зборска здаўна было асаблівым днём. У дзень памяці святых Касмы і Даміяна тут праводзіліся шыкоўныя кірмашы, якія ў наш час ператварыліся ў штогадовы Дзень вёскі.

Цяперашняе свята было незвычайным. На ім не знайшлося месца традыцыйным песням і танцам, прадаўцам салодкай ваты і папкорна. Іх змянілі цішыня, узнесласць і вера…

Як распавёў бізнэсмэн, мецэнат Міхаіл Фёдараў, абраз лекараў Касмы і Даміяна па замове на працягу шасці месяцаў пісаў карэльскі майстар-іканапісец. Мужчына ўжо доўгі час жыве ў Карэліі і шанец прыехаць на малую радзіму выпадае рэдка. Ведаючы, наколькі старанна людзі захоўваюць памяць пра храм, вырашыў прывезці ў падарунак абраз.

Разам з жыхарамі Зборска абраз сустракаў настаяцель манастыра іконы Божай Маці "Жываносная крыніца" ігумен Максім (Юндзіл), які асвяціў дар і з браціяй манастыра памаліўся за дабрабыт усіх прысутных.

Падораны абраз будзе захоўвацца ў Петра-Паўлаўскім храме аграгарадка Лапічы.

osipovichi-region.by