24.09.2025

Урачыстае адкрыццё аўтадрома Асіповіцкай раённай арганізацыйнай структуры ДТСААФ прайшло ў суботу

На мерапрыемстве прысутнічалі намеснік старшыні райвыканкама Ганна Землянухіна, старшыня Цэнтральнага савета ДТСААФ генерал-маёр запасу Андрэй Некрашэвіч, начальнік ракетных войскаў і артылерыі Узброеных Сіл з 2015 па 2022 гг. генерал-маёр запасу Генадзь Казлоўскі, прадстаўнікі аддзелаў райвыканкама, працоўных калектываў, грамадскіх арганізацый, моладзь, вайскоўцы.

Яшчэ да пачатку цырымоніі ў двары РАС ДТСААФ працавала выстава тэхнікі, якая выклікала асаблівую цікавасць малодшага пакалення. А вайскоўцы праводзілі майстар-клас па зборцы і разборцы зброі.

— Адкрыццё аўтадрома мае важнае значэнне ў жыцці раёна, — адзначыў у сваім выступе старшыня РАС ДТСААФ Юрый Сугакаў. — На абноўленай пляцоўцы будуць займацца дзеці, якія наведваюць секцыю аўтамотаспорту, а таксама навучацца вадзіцелі катэгорыі В.

Нікога не пакінула абыякавым відовішчнае паказальнае выступленне юных аўта- і мотааматараў, якія прадэманстравалі віртуознае валоданне транспартнымі сродкамі.

Андрэй Некрашэвіч уручыў членскія білеты ДТСААФ хлопцам, якія паказалі найбольш высокія вынікі ў абласных і рэспубліканскіх спаборніцтвах. Членамі ДТСААФ сталі Раман Шумілаў, Паліна Мароз, Іван Мяцельскі, Ульяна Майсееня, Раман Майсееня, Раман Рыжкоў, Кірыл Забаронак, Арцём Кірыловіч, Кірыл Апарышаў. За высокі ўклад у патрыятычнае і фізічнае выхаванне дзяцей іх бацькі атрымалі падзячныя лісты.

Прыемным сюрпрызам для аўтааматараў стала адкрыццё арт-аб'екта.

Як напамін пра тэхналагічны скачок у развіцці транспарту на п'едэстале ля аўтадрома размясцілася пятая мадэль аўтамабіля "Жыгулі", на якой з 1976 года навучалі кіроўцаў.

У гэты ж дзень на абноўленым аўтадроме прайшоў раённы конкурс "Аўталэдзі". Праводзіцца ён з 2013 г. і кожны год асіпаўчанкі даказваюць, што яны нароўні з прадстаўнікамі моцнага полу ўмеюць вадзіць машыну, выдатна ведаюць правілы дарожнага руху і здольныя знаходзіць рашэнні ў складаных сітуацыях. А яшчэ яны абаяльныя, крэатыўныя, творчыя. Пра гэта можна было меркаваць і па ўпрыгожаных аўтамабілях, якія дэманстравалі, дзе працуюць іх уладальніцы, чым захапляюцца, — інфармацыя была і сур'ёзнай, і забаўляльнай.

З усімі тэарэтычнымі пытаннямі і практычнымі заданнямі конкурснай праграмы ўдзельніцы справіліся выдатна. Мабыць, самым напружаным момантам стала замена колы, якую аўталэдзі выконвалі пры падтрымцы аднаго з памочнікаў.

Трэба адзначыць, што групы падтрымкі на працягу ўсяго спаборніцтва дапамагалі ўдзельніцам. Як і ў жыцці, калі нешта здарылася на дарозе — аўтамабільнае братэрства працягне руку дапамогі.

Пасля канцэртнай праграмы журы падвяло вынікі. Пераможцай у намінацыі "Аўта-хуткасць" стала Карына Пацкевіч, "Аўта-арыгінальнасць" — Таццяна Вараўко, "Аўта-інтэлект" — Вольга Жураўковіч. Эрыка Яковіч была названая "Віцэ=аўталэдзі", а Юлія Кудзіновіч атрымала галоўны тытул - "Аўталэдзі-2025".

osipovichi-region.by