30.07.2025

Студатрад з водарам хлеба. Навучэнцы Асіповіцкага каледжа ў складзе будатрада дапамагаюць нашым хлебапёкам

Лета — пара адпачынку. І кожны праводзіць яго па-свойму. Напрыклад, навучэнцы каледжа ў складзе будатрада дапамагаюць нашым хлебапёкам.

— Хлопцы займаюцца пакаваннем гатовай прадукцыі, — распавядае старшы майстар ААТ "Асіповіцкі хлебазавод" Наталля Паршукова. — Яны дапамагаюць нашым работнікам выконваць гэты важны этап вытворчага працэсу, які забяспечвае захаванасць прадукцыі і яе прэзентабельны выгляд. А заадно і знаёмяцца з тым, як хлеб прыходзіць на наш стол, колькі людзей розных прафесій задзейнічана ў яго вытворчасці. Імкнуцца выканаць давераную ім справу адказна.

Задзейнічаны навучэнцы і ў добраўпарадкаванні тэрыторыі. Пад кіраўніцтвам вядучага спецыяліста па арганізацыйнай працы Аляксандра Шаўчэнкі хлопцы і дзяўчаты прыводзяць у парадак клумбы, падразаюць кусты, наводзяць парадак на размешчаных побач аўтобусных прыпынках. "Калі хочаце бачыць вакол чысціню і парадак, прыкладзеце да гэтага свае рукі" — гэты пастулат хлопцы дзякуючы дасведчаным настаўнікам засвоілі выразна.

Канікулы працягваюцца, а значыць, яшчэ ёсць час усім школьнікам, навучэнцам, студэнтам праявіць сябе і сумленна зарабіць грошы.

osipovichi-region.by