01.12.2025

Школьнік з Асіповічаў стварыў унікальную гульнявую праграму, звязаную з падзеямі Вялікай Айчыннай вайны

Дзесяцікласнік СШ № 4 Яўген Ерашэвіч стаў дыпламантам III ступені рэспубліканскага конкурсу камп'ютарных распрацовак "ПАТРИОТ.by" і ўвайшоў у лік лепшых IT-розумаў краіны.

Работа Яўгена пад назвай "Belarus 1941-1944: Quiz" уяўляе сабой унікальную гульнявую праграму, у якой карыстальнікі могуць не толькі змагацца з ворагамі, але і адказваць на пытанні віктарыны, звязаныя з падзеямі Вялікай Айчыннай вайны. Такі падыход робіць гульню як забаўляльнай, так і адукацыйнай, што асабліва важна ў кантэксце патрыятычнага выхавання моладзі. За правільныя адказы гульцы зарабляюць дадатковыя ачкі, што дадае элемент канкурэнцыі і матывацыі.

— Вывучаць праграмаванне дадаткова пачаў два гады таму, калі вырашыў прайсці анлайн-курсы, — распавядае Яўген. - Вывучаў некаторыя мовы праграмавання і работу з гульнявым рухавічком (праграмны каркас, які прадстаўляе гатовыя інструменты і функцыі для распрацоўкі гульняў. — заўв. аўт.). На конкурс прадставіў свой першы вопыт стварэння гульні і не чакаў, што змагу дамагчыся такіх высокіх вынікаў. Ідэй было шмат, але не ўсе з іх удалося рэалізаваць. Падчас работы над праектам пастаянна ўзнікаюць новыя думкі, і такія праграмы патрабуюць пастаяннай дапрацоўкі.

Немалы ўклад у поспех Яўгена ўнесла настаўнік фізікі і матэматыкі Алена Мурашка. Яна адзначыла, што трапіць у лік пераможцаў рэспубліканскага конкурсу — гэта не толькі вялікі гонар, але і сур'ёзны выклік, асабліва ўлічваючы, што сярод удзельнікаў былі студэнты каледжаў, якія ўжо маюць вопыт праграмавання. "Яўген бліскуча справіўся з абаронай праекта, і гэта стала адным з фактараў яго поспеху", — падкрэслівае Алена Іванаўна.

Дасягненне Яўгена на рэспубліканскім узроўні з'яўляецца асабістым трыумфам, а таксама прыкладам таго, як захапленне інфармацыйнымі тэхналогіямі можа прывесці да значных дасягненняў.

osipovichi-region.by