20.03.2025

Сёння ў працоўных калектывах прадпрыемстваў і арганізацый раёна праходзіць адзіны дзень інфармавання насельніцтва

Яго тэма - Канстытуцыя Рэспублікі Беларусь - прававы фундамент адзінства і працвітання беларускага народа. Інфармацыйна-прапагандысцкая група на чале са старшынёй райвыканкама Андрэем Дубінчыкам сустрэлася з работнікамі Асіповіцкага доследнага лясгаса. З самага пачатку Андрэй Віктаравіч наладзіў аўдыторыю на плённыя зносіны, у выніку такімi яны і атрымалася.

Работнікі лясной гаспадаркі не толькі з цікавасцю паслухалі інфармацыю па асноўным пытанні, з якой выступіла галоўны спецыяліст аддзела ідэалогіі і па справах моладзі райвыканкама Алеся Букач, але і задалі шэраг пытанняў, якія іх цікавяць. Датычыліся яны ў асноўным стану дарог і бяспекі дарожнага руху, водазабеспячэння ў сельскіх населеных пунктах, у тым ліку стану грамадскіх калодзежаў, асвятлення вуліц.

Дарэчы, абмяркоўваліся не толькі праблемныя аспекты, але і ўносіліся канкрэтныя прапановы. Паколькі на сустрэчы прысутнічалі кіраўнікі камунальнай і дарожных арганізацый, на некаторыя пытанні адказы былі дадзены адразу, іншыя будуць вывучацца дадаткова, каб разабрацца ў іх дэталёва.

Як падкрэсліў кіраўнік раёна Андрэй Дубінчык, ніводная канструктыўная ініцыятыва не застанецца без увагі. А падобныя сустрэчы арганізуюцца ў тым ліку і для таго, каб даведацца, чым жывуць калектывы, якія ў людзей ёсць запыты і па магчымасці паспрыяць у іх рэалізацыі.

osipovichi-region.by