25.04.2025

Прайшоў раённы злёт юных ратавальнікаў

Традыцыйныя штогадовыя спаборніцтвы юных ратавальнікаў-пажарных правялі на гэтым тыдні на базе СШ № 4. Каля сотні юнакоў і дзяўчат з 17 школ раёна сабраліся, каб прадэманстраваць сілу, спрыт, кемлівасць і ўменне дзейнічаць у надзвычайных сітуацыях.

Юныя актывісты Беларускай маладзёжнай грамадскай арганізацыі ратавальнікаў-пажарных спаборнічалі ў чатырох этапах. Свае ўменні апранаць баявое адзенне, карыстацца пажарным абсталяваннем, правільна дзейнічаць у задымленым памяшканні і аказваць дапамогу чалавеку, які тоне, хлопцы прадэманстравалі ў конкурсах "Баявое разгортванне" і "Зводныя палявыя выпрабаванні". Зразумела, сітуацыі былі зымітаваны, а пацярпелыя ўмоўныя, аднак усе дзеянні па выратаванні выконваліся ад і да. Акрамя таго, паказалі ўдзельнікі і веды асноў бяспекі жыццядзейнасці, спынення крывацёку, накладання шын, правядзення сардэчна-лёгачнай рэанімацыі — у конкурсах "Знатакі АБЖ" і "Аказанне першай медыцынскай дапамогі". Ацэньвалі майстэрства юных ратавальнікаў-пажарных прадстаўнікі РАНС, райбальніцы, цэнтра творчасці дзяцей і моладзі і райаб'яднання Беларускага Чырвонага Крыжа.

Па выніках спаборніцтваў трэцяе месца заняла каманда Вязьеўскай школы, на другім - Свіслацкая СШ. Абсалютнымі пераможцамі злёту сталі актывісты СШ №1. А ўжо сёння гэтыя хлопцы выступаюць у заключным трэцім дні занальных спаборніцтваў у Бабруйску. Спадзяемся, убачым іх і на абласным злёце.

osipovichi-region.by