29.08.2025

Пасля летняга сезону 1 верасня ў раённым Цэнтры культуры і вольнага часу аднаўляюць работу клубныя фарміраванні, дзе любы жыхар горада можа знайсці цікавы занятак

Пра тое, што прапануе РЦК сваім наведвальнікам, даведаліся ў мастацкага кіраўніка Аксаны Мухі:

- Заўсёды рады бачыць юных асіпаўчан. Іх чакае ўзорны ансамбль танца "Асарці", маленькія артысты якога выклікаюць замілаванне ва ўсіх без выключэння гледачоў. У вакальным калектыве "Крышталь" хлопцы разаўюць пеўчыя здольнасці. А хлопчыкі і дзяўчынкі, якія жадаюць паспрабаваць сябе ў якасці акцёраў, змогуць увасобіць мары ў дзіцячай тэатральнай студыі "Вецер перамен". Пры РЦК працуе і лялечны тэатр "Ялінка", дзе хлопцы ажыўляюць казкі з дапамогай пальчаткавых, планшэтных, гапітных, роставых лялек і нават тантамарэсак. Даўно палюбіўся гледачам і народны ансамбль эстраднага танца "Капрыз", у якім вырасла не адно пакаленне танцораў.

Ва ўсіх гэтых калектывах ёсць розныя падгрупы, дзе рэпертуар падбіраецца ў адпаведнасці з узростам і індывідуальнымі магчымасцямі артыстаў.

Нашы спецыялісты займаюцца таксама і з дарослымі. Прадстаўнікі старэйшага пакалення, якія любяць і ўмеюць спяваць, могуць прыйсці ў народны хор ветэранаў працы, каб дарыць землякам радасць сустрэчы з песняй і адчуць сябе маладымі і поўнымі сіл. Людзі, якія валодаюць ігрой на музычных інструментах, запрашаюцца ў народныя цымбальны і духавы аркестры, якія актыўна выступаюць на розных канцэртных пляцоўках.

Далёка за межамі раёна вядомыя нашы заслужаны аматарскі калектыў Рэспублікі Беларусь народны ансамбль народнай песні і музыкі "Дзівакі" і народны ансамбль народнай песні і музыкі "Люлечка". У гэтым годзе яны таксама працягнуць канцэртную дзейнасць.

Тэатралаў спяшаюся ўзрадаваць: народны тэатр "Надзея" ў новым сезоне будзе дарыць вам сюрпрызы. Дарэчы, гледачы могуць і самі паспрабаваць стаць артыстамі. Будзем рады разгледзець усе прапановы.

Фатографаў-аматараў чакаем у фотаклубе "Раніца", дзе вы зможаце паўдзельнічаць у розных выставах, конкурсах. Будуць працаваць і сямейны клуб "Гармонія", клуб зносін "Натхненне", вакальна-інструментальны гурт "Шторм". Землякоў, якія пішуць вершы ці прозу, запрашаем у аб'яднанне "Літаратар", а тым, хто збірае значкі, манеты ці іншыя прадметы, прапануем уступіць у патрыятычны клуб "Калекцыянеры".

Ёсць у нас і два аб'яднанні для маладых мам і жанчын, занятых працай і домам, душа якіх патрабуе аддухі, — творчыя групы "Iмпульс Дэнс Лэдзі" і "Леда".

Увогуле, планаў шмат, аб'яднаннi на любыя густ і ўзровень падрыхтоўкі, будзем рады, калі яны папоўняцца новымі ўдзельнікамі.

Пытанні і прапановы чакаем па тэлефонах: 52-468 або +375 29 263-03-12.

osipovichi-region.by