03.03.2025

Ад мінулага да сучаснасці

Пакой гісторыі асіповіцкай міліцыі больш падобны на музей і з'яўляецца цэнтрам патрыятычнага выхавання не толькі супрацоўнікаў РАУС, але і школьнікаў і моладзі ў цэлым. Выклікае ён цікавасць таксама ў людзей старэйшага пакалення.

15 гадоў ветэранская арганізацыя па крупінках збірае экспанаты, сярод якіх ёсць унікальныя рэчы і дакументы.

У 43 тэматычных альбомах сабрана больш за 2 600 фатаграфій. Гардэроб з 29 камплектаў форменнай вопраткі і дзевяць манекенаў прадстаўляюць калекцыю абмундзіравання работнікаў міліцыі з 1943 года да цяперашніх дзён.

У экспазіцыі шырока прадстаўлена гісторыя Вялікай Айчыннай вайны і ўдзел у ёй супрацоўнікаў органаў правапарадку.

У 2023 годзе наш досвед працы быў абагульнены Рэспубліканскiм саветам ветэранаў органаў унутраных спраў і ўнутраных войскаў і рэкамендаваны да ўкаранення ў адпаведных падраздзяленнях. За год было праведзена 29 экскурсій, на якіх пабывалі школьнікі, члены працоўных калектываў і асабовы склад. А з ліпеня мінулага года мы пачалі згортваць сваю працу і рыхтавацца да “эвакуацыі” з прычыны распачатага капітальнага рамонту адміністрацыйных будынкаў, які працягваўся да снежня.

Абноўленае памяшканне набыло зусім новае "гучанне". Адрамантавана літаральна ўсё: сцены, падлога, столь. Пасля рамонту мы давялі да ладу экспазіцыі, дакументы.

3 лютага для абмену вопытам прыязджала дэлегацыя ветэранаў Пухавіцкага РАУС на чале з падпалкоўнікам міліцыі ў адстаўцы Мікалаем Свірыдавым - адбылася сустрэча ветэранскага актыву дзвюх суседніх абласцей.

4 сакавіка, у Дзень міліцыі, пакой гісторыі РАУС расчыніць дзверы для наведвальнікаў, і, вядома, першымі будуць яе стваральнікі.

Для абнаўлення памяшкання нямала сіл прыклала кіраўніцтва аддзела: начальнік РАУС Віктар Архіпенка, намеснік начальніка Андрэй Бабіч, супрацоўнікі, а таксама ветэранская арганізацыя, на долю якой выпала асноўная работа па афармленні пакоя. Высокую актыўнасць ва ўладкаванні праявілі ветэраны Анатоль Якаўлеў, Віктар Муха, Андрэй Альферовіч, Ігар Гапа, Міхаіл Кароткі, Уладзімір Паркалаў, Мар'яна Аскірка, Аляксандр Ражкоў, Аляксандр Епіхаў, Іван Харашун. Наш досвед яшчэ раз пацвярджае ісціну: прагрэс рухаюць энтузіясты. За бескарыслівую дапамогу ў стварэнні ўмоў па захаванні гістарычнай памяці бязмерная ўдзячнасць валанцёрам. Асобнай падзякі заслугоўвае адміністрацыя АЗАА, якая спансавала набыццё дзвюх музейных шаф, якія надалі памяшканню выгляд сапраўднага музея. Дзякуючы гэтаму падарунку пашырылася экспанаваная плошча, што дазволіла павялічыць колькасць экспанатаў для агляду, якіх у нас больш за 800.

Сардэчна запрашаем у наш цэнтр гісторыі і выхаваўчай работы!

Георгій Гаеўскі,

старшыня саветаў ветэранаў РАУС.