10.10.2025

Асіповіцкі РАУС адзначыў 100-годдзе з дня заснавання

У Асіповічах адбылося ўрачыстае мерапрыемства, прысвечанае 100-годдзю раённага аддзела ўнутраных спраў. Святочны канцэрт прайшоў у гарадскім цэнтры культуры і сабраў кіраўнікоў раёна, ветэранаў, дзеючых супрацоўнікаў і гасцей.

Павіншаваць калектыў з векавым юбілеем прыехалі начальнік УУС Магілёўскага аблвыканкама Ігар Шчарбачэня, старшыня Асіповіцкага райвыканкама Андрэй Дубінчык, старшыня Асіповіцкага раённага Савета дэпутатаў Уладзімір Рыжанкоў, старшыня абласнога Савета ветэранаў АУС і ВВ Яўген Кавалёнак, а таксама прадстаўнікі міліцыі суседніх раёнаў.

У сваім звароце Ігар Шчарбачэня адзначыў, што супрацоўнікі Асіповіцкага РАУС на працягу ўсяго стагоддзя з гонарам нясуць службу, абараняючы жыццё і бяспеку грамадзян:

"На вашым рахунку нямала дасягненняў, але галоўнае — гэта павага і давер людзей, якія ведаюць, што вы заўсёды прыйдзеце на дапамогу. Асаблівыя словы падзякі — ветэранам, чыімі намаганнямі стваралася і ўмацоўвалася міліцыя раёна".

Лепшыя супрацоўнікі атрымалі заслужаныя ўзнагароды — Граматы міністра ўнутраных спраў, нагрудныя знакі "За выдатную службу" і "Выдатнік міліцыі", а таксама падзякі і заахвочваннi ад кіраўніцтва УУС. Начальніку Асіповіцкага РАУС Сяргею Багдановічу ўручылі падарункавы сертыфікат. Не засталіся без увагі і ветэраны, сярод якіх былыя начальнікі аддзела розных гадоў.

Завяршыў свята канцэрт заслужанага калектыву Рэспублікі Беларусь духавога аркестра ГУУС Мінгарвыканкама, які стварыў атмасферу ўрачыстасці і ўдзячнасці людзям, якія стаяць на варце правапарадку ўжо цэлае стагоддзе.

mogilevnews.by