16.12.2025

Асіповіцкі раён стаў пляцоўкай для абмену вопытам дырэктароў культурна-забаўляльных устаноў вобласці

10-11 снежня ў Асіповічах прайшоў абласны семінар дырэктароў клубных устаноў, прысвечаны сучасным практыкам работы культурна-забаўляльных устаноў і развіццю культуры ў Магілёўскай вобласці

Гэта мерапрыемства стала важнай вяхой у абмеркаванні актуальных пытанняў функцыянавання сферы і сабрала спецыялістаў, зацікаўленых у абмене вопытам і ўкараненні інавацыйных падыходаў.

Праграма семінара стартавала ў гарадскім цэнтры культуры "Равеснік" яркім балем пад назвай "Навагодняе адзінства: час для ўсіх". У ім удзельнічалі выхаванцы аматарскіх харэаграфічных калектываў, выпускнікі сярэдніх школ, маладыя афіцэры і асіпаўчане залатога ўзросту.

На пасяджэнні абласнога савета дырэктароў клубных устаноў абмяркоўваўся шырокі спектр тэм. Асноўная ўвага была нададзена тэндэнцыям развіцця культурных складнікаў рэгіёну, а таксама ролі культуры як сродку камунікацыі ў сучасным грамадстве. Сёння культура з'яўляецца не толькі адлюстраваннем гістарычных і сацыяльных працэсаў, але і важным інструментам фарміравання грамадскай думкі і ўмацавання міжасобасных сувязяў.

Госці мелі магчымасць пазнаёміцца з дзейнасцю гісторыка-краязнаўчага музея і фотаклуба "Раніца", атрымаць асалоду ад відовішчнага рэвю "У віхуры музыкі і танца", падрыхтаванага аматарскімі калектывамі раённага цэнтра культуры і вольнага часу. Удзельнікі прадставілі гледачам харэаграфічныя пастаноўкі і музычныя выступленні, якія дэманструюць багацце і разнастайнасць культурнага жыцця раёна.

Наступным пунктам маршруту творчай дэлегацыі стала сярэдняя школа № 5, дзе ўдзельнікаў семінара чакала знаёмства з дзейнасцю цэнтралізаванай бібліятэчнай сеткі, дзіцячых школ мастацтваў, ваенна-патрыятычных клубаў "Волат" і "Гарнізон". У рамках самапрэзентацыі ўстановамі былі арганізаваны квэст "Дыхай мастацтвам", які складаўся з майстар-класаў па гульні на музычных інструментах, харэаграфіі і выяўленчага мастацтва, і выставы дзіцячых работ "Калядная зорка" і "Вясёлка ўяўлення", макетаў ваенных ордэнаў і медалёў.

Другі дзень семінара прайшоў не менш плённа: вопытам работы дзяліўся Вязьеўскі сельскі Дом культуры. Работнікі ўстановы паказалі тэатралізаваныя прадстаўленні "Калядкі" і "Саўка ды Грышка ладзілі дуду павесяліцца з ёй на каляду", арганізавалі майстар-класы па вырабе сувеніра "Вяззеўская торбачка шчасця" і па гульні на традыцыйных беларускіх музычных інструментах. Вязьеўская сельская бібліятэка прадставіла тэматычную краязнаўчую выставу "Малая радзіма ў люстэрку падзей і лёсаў".

Завяршыўся семінар у раённым Цэнтры культуры, дзе талентам з гасцямі падзяліліся народны ансамбль народнай песні і музыкі "Люлечка2, узорная студыя ткацтва "Чароўныя ўзоры2, лялечны тэатр "Ялінка" і заслужаны аматарскі калектыў Рэспублікі Беларусь, народны ансамбль народнай песні і музыкі "Дзівакі".

Намеснік дырэктара УК "Магілёўскі абласны метадычны цэнтр народнай творчасці і культурна-асветнiцкай работы" Іна Балаўнёва:

- Гэты семінар спецыяльна ствараўся і праходзіць кожны год падчас падвядзення вынікаў работы галіны культуры. Сёлета Асіповіцкі раён выбраны месцам яго правядзення не проста так: гэта самы актыўны і прадуктыўны раён, які можа паказаць найлепшыя метады і формы работы ў нашай галіне. І магу сказаць, што асіпаўчане здзівілі ўсіх. Асабліва ўразіў узровень развіцця харэаграфічнага мастацтва. Менавіта гэты кірунак у нас у вобласці трошкі прасядае і дастаткова развіты толькі ў Бабруйску і Бабруйскім раёне, Кіраўску і Асіповічах. Культуру можна ўпэўнена лічыць мясцовым брэндам, бо ў вас ужо ёсць мерапрыемствы і людзі, здольныя зацікавіць гасцей рэгіёну.