08.04.2025

Асіповіцкі раён. З вiдам на "Зіён"

Да пагаршэння ўмоў надвор'я рыхтаваліся, але такое пагоднае падступства стала для ўсіх вельмі непрыемным сюрпрызам. Тым больш што наш раён аказаўся найбольш пацярпелым ад штармавога цыклона "Зіён", імя якога мы дакладна зробім нарыцальным, як гэта ўжо было з "Хаўерам" і "Даніелай".

Але гэта справа будучыні. А пакуль трэба пратрымацца да вяртання нармальнага красавіцкага надвор'я - яго сіноптыкі абяцаюць у канцы тыдня. Раскажам аб тым, як раён супрацьстаяў напору стыхіі ў нядзелю і панядзелак.

Першымі адчулі, што сітуацыя выходзіць за рамкі чаканага, работнікі АРЭС. З-за рэзкага перападу тэмпературы паветра пры моцным снегападзе пачалося крытычна хуткае наліпанне снегу на абсталяванне паветраных ліній электраперадач і дрэвы, што прывяло да масавых абрываў правадоў на самых распаўсюджаных ЛЭП напружаннем 10 кілавольт і 0,4 кілавольта і амаль адначасоваму абясточванню 62 населеных пунктаў.

У работах па ўстараненню аварый з 01 гадзіны 6 красавіка былі задзейнічаны ўсе пяць аварыйных брыгад. Але надвор'е не паляпшалася, колькасць парываў нарастала і да 5 гадзін раніцы стала відавочна, што ўласнымі сіламі АРЭС з сітуацыяй не справіцца. Патрэбны былі людзі, тэхніка і, галоўнае, мабільныя дызель-генератары для забеспячэння электрычнасцю малочнатаварных ферм, сістэм водазабеспячэння, сувязі, кацельняў і дамоў з электра- і газавым абаграваннем: аўтаматыка сучасных ацяпляльных сістэм без электраэнергіі не працуе.

У кожным рэгіёне ёсць рэзерв аўтаномных крыніц электраэнергіі, але для экстранных патрэб Асіповіцкага раёна людзей і тэхніку прыйшлося збіраць з усёй вобласці. Вядома, іх дастаўка запатрабавала нямала часу. З улікам складанай сітуацыі на дарогах - каля дзесяці гадзін.

Да вечара ў раёне працавала каля 120 аварыйшчыкаў, было задзейнічана 23 аўтаномныя крыніцы энергіі, што дало магчымасць значна скараціць колькасць абясточаных населеных пунктаў, забяспечыць электрасілкаваннем усе крытычна важныя аб'екты сацыяльнай інфраструктуры і сельскай гаспадаркі. (Аднаўленне энергасістэмы раёна на момант здачы матэрыялу ў друк працягвалася ў тым жа асаблiва напружаным тэмпе).

Для дарожнікаў і камунальнікаў красавіцкая непагадзь таксама стала сур'ёзным выпрабаваннем. Вялікая колькасць снегу, паваленых дрэў, абламаных галінак на тратуарах і праезнай частцы… Прыйшлося працаваць з поўнай напругай сіл і ў кругласутачным рэжыме. Змагацца са стыхіяй ім дапамагалі калектывы прадпрыемстваў, вайскоўцы, валанцёры БРСМ.

Асабліва каштоўнай для расчысткі дарог раённага значэння была дапамога лясгаса і Жорнаўскай эксперыментальнай лясной базы.

Кіраўніцтва раёна і раённая камісія па надзвычайных сітуацыях прыступілі да працы ў 5 гадзін нядзельнай раніцы. Першапачатковай задачай было правільна вызначыць маштаб узніклых праблем, аптымальна размеркаваць наяўныя рэсурсы і дакладна сфармуляваць, каму і ў чым патрэбна дапамога. Сітуацыя ўвесь час змянялася, аднак план правядзення аварыйна-аднаўленчых работ быў падрыхтаваны ў найкароткія тэрміны. Ім вызначалася, якія дзеянні задзейнічаных у барацьбе са стыхіяй структур будуць найбольш эфектыўнымі, і прагназавалася, колькі часу спатрэбіцца, каб у цэлым аднавіць энергасістэму раёна.

Калі надвор'е не прынясе новых сюрпрызаў, усе лініі з напружаннем 10 кілавольт будуць падключаны на працягу бліжэйшых сутак, а колькасць парываў на лініях 0,4 кілавольта будзе зведзена да мінімуму.

Аднак застаецца невядомым, колькі часу спатрэбіцца на расчыстку дарог, бо снегапад працягваецца. На перыяд непагадзі арганізавана дастаўка вады для школ, медустаноў і насельніцтва ў абясточаных населеных пунктах, дзейнічае гарачая лінія (тэл. 24-774), куды можна звяртацца па пытаннях атрымання дапамогі ў складаных сітуацыях, выкліканых цыклонам "Зіён".

Пры ўзнікненні здарэнняў і надзвычайных сітуацый можна звяртацца ў РАНС па тэлефонах 101 ці 112.

Дарэчы, асіповіцкія ратавальнікі за 6-7 красавіка здзейснілі больш за 30 выездаў на дапамогу насельніцтву і арганізацыям. Сярод іх быў і такі. У вёсцы Вуглата 73-гадовая жанчына знаходзілася на апараце ШВЛ, таму адсутнасць электрычнасці пагражала яе жыццю… Работнікі МНС своечасова даставілі і падключылі рэзервовы генератар, і чалавек быў выратаваны.

Падрабязнасці аб барацьбе са стыхіяй - у тэлеграм-канале "АК" і на іншых інтэрнэт-рэсурсах выдання.

osipovichi-region.by