24.12.2025

Асіповіцкія школьнікі заваявалі першыя месцы на занальным этапе рэспубліканскага маладзёжнага праекта "100 ідэй для Беларусі"

22 снежня ў Клічаве былі вызначаны лепшыя маладзёжныя праекты занальнага этапу рэспубліканскага конкурсу "100 ідэй для Беларусі".

На конкурсную абарону было прадстаўлена шэсць перспектыўных распрацовак асіповіцкіх школьнікаў 9-11 класаў. Экспертнае журы высока ацаніла як актуальнасць тэм, так і глыбіню іх прапрацоўкі.

У намінацыі "Экалогія" вышэйшую ацэнку атрымаў праект "У гасцях у зубра". Яго аўтар Таццяна Дзюбіч, навучэнка 10 "А" класа СШ № 3. Таццяна знайшла спосаб гаварыць аб захаванні нацыянальнага сімвала ярка, інтэрактыўна і сучасна, залучаючы ў гэтую важную місію аднагодкаў.

Перамогу ў прэстыжнай намінацыі "Iнфармацыйна-камунікацыйныя тэхналогіі" атрымаў Яўген Ерашэвіч (10 "Б" клас, СШ № 4). Ён прадставіў не проста гульню, а сур'ёзны адукацыйны прадукт — камп'ютарную віктарыну Belarus 1941-1944: Quiz. Гэты праект — мост паміж гераічным мінулым Беларусі і лічбавым пакаленнем, прыклад таго, як IT-сфера можа служыць патрыятычнаму выхаванню.

У намінацыі "Нацыянальная бяспека і абарона ад надзвычайных сітуацый" перамагла камандная работа дзесяцікласнікаў СШ № 4 Яўгена Ерашэвіча і Данііла Сураўца. Іх "Даследаванне праходнасці робатаў-разведчыкаў" — гэта ўжо не школьная задача, а прыкладная навуковая работа. Праект мае прамы практычны выхад і паказвае, што маладыя розумы ўжо сёння думаюць аб тэхналогіях, здольных ратаваць жыццi.

— Калі бачыш, як дзесяцікласнікі ствараюць экалагічныя асветніцкія праекты, распрацоўваюць гульні для вывучэння гісторыі і праводзяць сур'ёзныя даследаванні ў робататэхніцы, разумееш: у нашай краіны магутная будучыня. Для БРСМ такія перамогі не проста радок у справаздачы, а галоўны паказчык, што мы рухаемся ў правільным напрамку, ствараючы асяроддзе, дзе смелыя ідэі маладых знаходзяць падтрымку і прызнанне. Жадаю нашым пераможцам не спыняцца. Вашы "100 ідэй" ужо сёння мяняюць жыццё да лепшага, — адзначыла першы сакратар РК БРСМ Яўгенія Ільева.

Поспех нашых юных наватараў — гэта сігнал. У рэгіёнах расце пакаленне, якое думае глабальна, здольнае вырашаць комплексныя задачы ад экалогіі да абароны. Перамога ў Клічаве — толькі першы крок, наперадзе ў хлопцаў магчымасць прадставіць свае ідэі на абласной пляцоўцы і ўнесці рэальны ўклад у будучыню краіны.

osipovichi-region.by