10.07.2025

Асіповіцкая РАС ДТСААФ сустрэла Дзень Незалежнасці новымі прапановамі

ДТСААФ, заўсёды імкнецца адпавядаць выклікам часу, працягвае ўмацоўваць матэрыяльна-тэхнічную базу. Пачатак года адзначыўся адкрыццём класа па мотаспорце, хутка заваяваўшым папулярнасць сярод юнакоў і дзяўчат. Імклівы рост колькасці выхаванцаў запатрабаваў пашырэння мотапарку і абнаўлення экіпіроўкі. І вось напярэдадні галоўнага дзяржаўнага свята ДТСААФ атрымаў шчодры падарунак ад цэнтральнага савета — новыя матацыклы, гоначны картынгавы аўтамабіль і спецыяльную ахоўную экіпіроўку. Навінкі сталі сапраўднай разыначкай абноўленага класа.

Усведамляючы растучую ролю беспілотных лятальных апаратаў у сучаснай арміі і грамадзянскай сферы, кіраўніцтва арганізацыі прыняло рашэнне адкрыць спецыялізаваны клас па дрон-рэйсінгу.

Гэта дынамічна развіваемы від спорту, які патрабуе высокай хуткасці рэакцыі, дакладнасці і аналітычных здольнасцяў. Спартсмены спаборнічаюць у кіраванні хуткаснымі дронамі на спецыяльна абсталяваных трасах з перашкодамі, развіваючы навыкі, карысныя як у спорце, так і прафесійнай дзейнасці, звязанай з беспілотнымі сістэмамі.

Новы клас дрон-рэйсінгу абсталяваны па апошнім слове тэхнікі і ўключае дзве трэніровачныя зоны. Кампутарны сімулятар абсталяваны сучаснымі джойсцікамі і праграмным забеспячэннем, якія дазваляюць адпрацаваць базавыя навыкі пілатавання, зразумець спецыфіку кіравання дронам ў віртуальным асяроддзі. Зона практычных палётаў уяўляе спецыяльна абсталяваную прастору, якая забяспечвае бяспечныя трэніроўкі з рэальнымі дронамі і эфектыўную адпрацоўку навыкаў на практыцы. Гэта дапаможа прыстасавацца да рэальных умоў палёту і адчуць дынаміку дрона.

Заняткі, даступныя дзецям ад 14 гадоў, будуць праходзіць пад кіраўніцтвам вопытных выкладчыкаў Дзмітрыя Кірыловіча і Юрыя Сугакова. Праграма навучання ўключае не толькі пілатаванне, але і навігацыю, штурманскую справу, а таксама тэхнічнае абслугоўванне дронаў. Акрамя гэтага, выхаванцы новай секцыі вывучаць асновы аэрадынамікі, асновы работы з картамі, планаванне палётаў і пытанні бяспекі.

osipovichi-region.by