13.01.2026

Знайшлі сваякоў і аднавілі біяграфію: як у Асіповіцкім раёне шукалі сляды ветэрана 141-й дывізіі.

Раёнка ў адным з лістападаўскіх нумароў (гл. «АК» № 89 ад 18.11.2025 г. «Памяць») размяшчала аб'яву супольнасці нашчадкаў байцоў 141-й стралковай дывізіі аб вышуку сваякоў ветэрана Вялікай Айчыннай вайны Міхаіла Еўдакімавіча.

Дзякуючы неабыякавым землякам было ўстаноўлена, што ветэран пайшоў з жыцця ў 1986 годзе, знаходзіцца на мясцовых могілках. Таксама ўдалося адшукаць дачку Валянціну, якая жыве зараз у Мінску.

Супольнасць ветэранаў перадала з Расіі два экзэмпляры кнігі пра баявы шлях і людзей 141-й дывізіі — для сваякоў і ў раённы гісторыка-краязнаўчы музей.

Перадаючы кнігу ў музей, дачка воіна падзялілася фатаграфіямі з сямейнага архіва, расказала пра яго пасляваенны лёс.

Міхаіл Андрэевіч Еўдакімавіч нарадзіўся ў 1920 годзе. Пайшоў на фронт у першыя дні вайны. Ваяваў, быў у палоне, бег, ваяваў у партызанскім атрадзе, спаўна выпрабаваў усе нягоды ваенных гадоў.

Вярнуўшыся на радзіму, жыў і працаваў у Пратасевічах. Аднаўляў разбураную гаспадарку, гадаваў хлеб. Доўгі час быў брыгадзірам паляводчай брыгады, а затым перасеў на тэхніку, працаваў механізатарам-трактарыстам. Выйшаўшы на пенсію, не стаў сядзець дома - працаваў вартаўніком у цяплічнай гаспадарцы саўгаса «Пратасевічы».

Галоўнае багацце яго жыцця - моцная вялікая сям'я. З жонкай выгадавалі і выхавалі траіх сыноў і тры дачкі. Дачакаўся Міхаіл Андрэевіч і 11 унукаў. У памяці родных ён застаўся верным і кахаючым мужам, клапатлівым бацькам і дзядулем.

Вось такая, здавалася б, кароткая і звычайная біяграфія, усяго некалькі слоў. Але якіх! Ваяваў... Аднаўляў... Расціў хлеб і дзяцей...

Цёплыя словы падзякі хацелася б выказаць работнікам Пратасевіцкага сельвыканкама — старшыні Таццяне Пахоменка, упраўляючай справамі Алене Падвойскай, а таксама многім іншым удзельнікам пошуку. Разам мы не толькі аднавілі біяграфію воіна-земляка, але і захавалі часцінку гістарычнай памяці аб гераізме ўсяго беларускага народа.

Валянцін ШПАК, каардынатар інтэрнет-праекта “Электронная кніга “Памяць. Асіповіцкі раён»».

osipovichi-region.by