12.08.2025

Аб важнейшых падзеях у будаўнічай галіне раёна расказвае начальнік аддзела архітэктуры і будаўніцтва Асіповіцкага райвыканкама

Будуем зараз, удасканальваем, думаем пра перспектывы.

Начальнік аддзела архітэктуры і будаўніцтва райвыканкама Іван Малаковіч:

— У сферы будаўніцтва ў 2025 годзе назіраецца адноснае зацішша. Але толькі ў параўнанні з рэкордным 2024 годам.

Параўнаем. Мінулы год: рэалізацыя маштабных інвестыцыйных праектаў па стварэнні новых вытворчых ліній на АЗАА і філіяле "Ялізава" ААТ "Гродзенскі шклозавод"; будаўніцтва СШ № 5, узвядзенне некалькіх шматпавярховых жылых дамоў і ведамасных аб'ектаў. Фінансавы эквівалент створанага - 130 мільёнаў рублёў.

У бягучым годзе інвестыцыі ў капітальнае будаўніцтва складуць каля 60 мільёнаў, з якіх 18 (з 40 мільёнаў, прадугледжаных каштарысам праекта) плануецца ўкласці ў пачатковы этап рэканструкцыі ачышчальных збудаванняў горада.

Будзе завершана ўзвядзенне яшчэ аднаго шматпавярховага дома ў мікрараёне вуліцы Чарняхоўскага, і, што важна, гэта адбудзецца да наступлення зімы. Раней здача жылля ў эксплуатацыю не прывязвалася да сезону і даволі часта дамы засяляліся ў канцы года, а пачатак работ па добраўпарадкаванні дваровых тэрыторый пераносіўся на вясну наступнага. Цяпер патрабаванні змяніліся: завяршаць усе работы на аб'екце неабходна на працягу каляндарнага года, і гэта датычыцца ўсёй Магілёўскай вобласці.

Умова здаецца простай, але на самой справе яе выкананне магчыма толькі пры сур'ёзных арганізацыйных зменах на ўсіх этапах работы і ў першую чаргу пры падрыхтоўцы да будаўніцтва і рэалізацыі так званага "нулявога цыклу". Выгады новага падыходу важкія: эканомія сродкаў, больш раўнамерная загрузка будаўнічых арганізацый, павышэнне якасці жыцця навасёлаў — навядзенне парадку ў дварах пасля ўводу дамоў у эксплуатацыю будзе адбывацца значна хутчэй. Вядома, аб гэтых момантах ніколі не забывалі, але ўлічыць іх атрымлівалася далёка не заўсёды. І тое, што станоўчыя зрухі адбыліся ў Год добраўпарадкавання, — адно з яго важкіх дасягненняў.

Напрыклад, спатрэбілася ўнесці карэктывы ў ход падрыхтоўкі праектна-каштарыснай дакументацыі да экспертызы. На праверку ПСД і яе дапрацоўку, як правіла, адводзiцца некалькі месяцаў, пасля чаго некаторы час займае арганізацыйны перыяд — пошук падрадчыкаў і г.д. Таму новабудоўлі не заўсёды ўдавалася пачынаць у аптымальныя тэрміны.

Цяпер распрацоўку ПСД будаўніцтва дамоў на наступны год трэба завяршаць да 1 ліпеня бягучага года, а пачынаць іх узвядзенне — зімой. Сёння з улікам гэтых патрабаванняў падрыхтавана дакументацыя ўжо на два шматпавярховыя дамы — 40- і 72-кватэрныя.

Важныя перамены ў жыцці беларускіх будаўнікоў звязаны з прыняццем Кодэкса аб архітэктурнай, горадабудаўнічай і будаўнічай дзейнасці. Новы звод прававых норм уступіў у сілу ў мінулым годзе, але цалкам яго дзейснасць была праяўлена ў цяперашнім. Калі коратка, кодэкс эфектыўна вырашае многія пытанні, якія назапасіліся ў галіны за апошнія дзесяцігоддзі, так што працаваць стала прасцей і заказчыкам, і падрадчыкам. Гэта станоўча адаб'ецца на якасці выканання будаўнічых работ.

... Гаворачы аб цяперашніх справах у будаўніцтве, нельга пакідаць без увагі і перспектывы горадабудаўніцтва ў цэлым. За апошняе дзесяцігоддзе Асіповічы прыкметна выраслі, змяніліся — шмат у чым сталі сучасным горадам. Аднак задач, якія неабходна вырашаць, застаецца нямала. Адна з іх — пераўтварэнне гарадскіх паркаў у паўнавартасныя рэкрэацыйныя зоны. Першы крок зроблены — парк на паўднёвым баку горада сёлета ўжо цалкам адпавядае такім патрабаванням.

Перапланіроўка парка на паўночным баку па стандартах ХХІ стагоддзя — складаная і затратная справа, так што аб канкрэтных тэрмінах казаць пакуль рана. Але галоўнае — бачыць мэту і імкнуцца да яе дасягнення!

osipovichi-region.by