13.08.2025

На стадыёне "Лакаматыў" у Асіповічах вядуцца работы па мадэрнізацыі і добраўпарадкаванні

Стадыён "Лакаматыў" штогод набывае ўсё больш сучасны выгляд. Сёння на ім вядуцца чарговыя работы па мадэрнізацыі і добраўпарадкаванні. На гэты раз мэта — сучасныя зручныя распранальні, адсутнасць якіх вельмі прыкметна на фоне ўжо гатовых спартыўных аб'ектаў — футбольнага поля са штучным пакрыццём і шматфункцыянальнай гульнявой пляцоўкі.

— Модульны комплекс для пераапранання размесціцца злева ад цэнтральнага ўваходу, — распавядае галоўны спецыяліст сектара спорту і турызму райвыканкама Вольга Емяльянава. — Тут з'явяцца дзве распранальні на 20 месцаў, а таксама трэнерская. Да комплексу будуць падведзены вада, электрычнасць і ацяпленне, што дазволіць з максімальным камфортам і нават у халодную пару года карыстацца распранальнямі. Вядома ж, у першую чаргу комплекс будзе прызначаны для дзяцей, якія займаюцца ў дзіцяча-юнацкай спартшколе і на працягу навучальнага года трэніруюцца на "Лакаматыве". Таксама будзем прадастаўляць сучасныя месцы для пераапранання і на час правядзення розных спаборніцтваў.