10.10.2025

На працягу трох дзён юныя асіпаўчане змагаліся за званне лепшых у спаборніцтвах па міні-футболе, прысвечаных 100-годдзю ўтварэння Асіповіцкага райаддзела ўнутраных спраў

На пляцоўцы са штучным пакрыццём на тэрыторыі СШ № 1 выступілі юнакі 2009 года нараджэння і маладзейшыя, якія прадстаўлялі ўсе школы горада і каледж.

Ва ўрачыстай цырымоніі адкрыцця прынялі ўдзел начальнік РАУС Сяргей Багдановіч, метадыст раённага вучэбна-метадычнага кабінета Міхаіл Грыгорчык і галоўны суддзя спаборніцтваў настаўнік фізічнай культуры і здароўя гімназіі Аляксандр Шылец. Сяргей Аляксандравіч расказаў аб нагодзе, у гонар якой праводзіцца турнір, даў старт спаборніцтвам і пажадаў юным футбалістам сумленных і яркіх перамог.

У сераду адбыліся два фінальныя матчы. У выніку найбольш тэхнічнымі, зладжанымі і ўдачлівымі апынуліся гульцы гімназіі. Футбалісты СШ № 3 занялі другое месца, спартсмены СШ № 4 — трэцяе. Заслужаныя ўзнагароды гульцам уручылі Сяргей Багдановіч, Міхаіл Грыгорчык і начальнік інспекцыі па справах непаўналетніх РАУС Яўген Вішнякоў. Пераможцы і прызёры атрымалі кубкі, медалі і дыпломы адпаведных ступеняў, а таксама сувеніры і салодкія падарункі.

osipovichi-region.by