17.10.2025

Месячнік "Чалавек з белым кіем" праходзіць у Асіповіцкім раёне

У Беларусі месячнік "Чалавек з белым кіем" праводзіцца з 1987 года. Яго часовыя рамкі пазначаныя двума датамі: 15 кастрычніка — Міжнародным днём белага кія — і 13 лістапада — Сусветным днём сляпых.

Гісторыя белага кія як сімвала слепаты бярэ пачатак у 1921 годзе. У брытанскім горадзе Брысталі жыў малады прафесійны фатограф Джэймс Бiгс, які пасля няшчаснага выпадку страціў зрок. Трэба было пачынаць новае жыццё, і ён стаў вучыцца самастойна хадзіць па горадзе пры дапамозе кія. Але неўзабаве зразумеў, што на яго чорны кій не рэагуюць ні мінакі, ні кіроўцы. Тады ён пафарбаваў яго ў белы колер - і ён стаў прыкметным. Гэту навіну падхапілі невідушчыя не толькі Англіі, але і Еўропы, Амерыкі.

Сёння ў нашым раёне жыве 161 чалавек з інваліднасцю па зроку, сярод іх 19 інвалідаў першай групы, 34 — другой і 92 — трэцяй, 16 дзяцей-інвалідаў.

Месячнік "Чалавек з белым кіем" - гэта магчымасць не толькі больш прадуктыўна вырашаць надзённыя пытанні інвалідаў па зроку, але і мяняць уяўленне людзей аб тым, як жыве ў сучасным свеце невідушчы чалавек і якіх поспехаў можа дамагчыся. Месячнік таксама з'яўляецца падставай нагадаць землякам пра тое, што побач жывуць невідушчыя людзі, расказаць пра іх праблемы. Будзьце дабрэй адзін да аднаго і перш за ўсё да невідушчых і са слабым зрокам людзям. Заўсёды старайцеся аказаць ім магчымую дапамогу, не губляючы пры гэтым цярпення, ветлівасці і тактоўнасці.

Галіна Стрэльская, загадчык аддзялення сацыяльнай рэабілітацыі, абілітацыі інвалідаў і дзённага знаходжання для грамадзян пажылога ўзросту РЦСАН.

osipovichi-region.by