12.08.2025

Лагер працы і адпачынку "Ударнік" паспяхова функцыянуе ў Асіповіцкім раёне

Два тыдні насычаных падзей, новых ведаў і карысных навыкаў — менавіта так можна ахарактарызаваць знаходжанне ў лагеры працы і адпачынку "Ударнік" 30-ці хлопцаў і дзяўчат 14-16 гадоў

— У нас адпачываюць і працуюць навучэнцы школ №№ 1, 3 і 4, а таксама гімназіі, — расказвае дырэктар лагера Алена Хальцова. — Збіраем актыўных школьнікаў ужо пяты год, і, дарэчы, гэта адзіны лагер працы і адпачынку ў раёне з кругласутачным знаходжаннем. Дзеці пражываюць на тэрыторыі выхаваўча-аздараўленчага лагера "Крыніца", дзе для іх арганізавана пяціразовае харчаванне.

Праца дзяўчынак і хлопчыкаў засяроджана ў сельгаспрадпрыемстве "Авангард-Ніва". Яны актыўна ўдзельнічаюць у добраўпарадкаванні тэрыторыі (падтрыманне чысціні, праполка раслін, складаванне дроў і іншыя работы), а таксама дапамагаюць работнікам фермы і збожжатаку.

— Працоўная дзейнасць у такіх умовах — добры выхаваўчы момант, — адзначае Алена Сяргееўна. — Падлеткі ўсведамляюць, наколькі важная праца ў сельскай гаспадарцы, пачынаюць шанаваць у цэлым фізічную працу, а таксама пераасэнсоўваюць сваё стаўленне да вучобы. Гэтая практыка не толькі дае рабятам яркія ўражанні, але і фармуе ў іх пачуццё адказнасці і каманднага ўзаемадзеяння.

Цікава, што з 30 сённяшніх выхаванцаў 24 ужо былі ў гэтым лагеры ў мінулыя гады — добры паказчык таго, што дзецям падабаецца сумяшчаць грамадска карысную працу і адпачынак.

Немалаважна для рабят і тое, што яны атрымаюць не толькі заработную плату, але і працоўную кніжку з аформленым страхавым полісам, што, без сумневу, спатрэбіцца ім у будучыні.

Частка падлеткаў працуе да абеду, іншая — пасля, што робіць нагрузку раўнамернай і дазваляе кожнаму паўнавартасна адпачываць. У вольны час хлопцы і дзяўчаты ўдзельнічаюць у спартыўных спаборніцтвах, творчых конкурсах, гульнях, вячэрніх забаўляльных праграмах.

Па выходных хлопцы адпраўляюцца на гарадскі пляж і арганізоўваюць там таварыскія матчы па пляжным валейболе і іншыя актыўнасці.

Падзяліліся сваімі ўражаннямі з раёнкай і выхаванцы лагера.

Алена Пахоменка:

— Пра лагер я даведалася ад сяброў і настаўнікаў і вырашыла паспрабаваць такі від адпачынку падчас канікулаў. Працаваць падабаецца. І заробленыя грошы, канешне, будуць дарэчы. Калектыў у нас вельмі дружны, мы ўсе адзін аднаго падтрымліваем, разам удзельнічаем у мерапрыемствах і, што асабліва прыемна, займаем прызавыя месцы. Харчаванне тут выдатнае — пяць разоў на дзень, усё смачнае і свежае.

Уладзіслаў Гоцін:

— У мяне з'явілася шмат новых сяброў, з якімі працягну зносіны і далей. Але галоўнае, я зразумеў, як важна шанаваць вынікі працы — свае і іншых людзей.

osipovichi-region.by