28.07.2025

Якія інавацыйныя праекты ў 2025/2026 навучальным годзе плануюць рэалізоўваць у школах Асіповіцкага раёна

Як ідзе падрыхтоўка да 1 верасня і што новага плануецца ў школах і гімназіях, распавяла начальнік аддзела па адукацыі Асіповіцкага райвыканкама Ірына Сяргейчык.

— Раён заўсёды славіўся высокай якасцю адукацыі, кожны год стараемся трымаць гэтую планку і даваць дзецям самае лепшае. Важна, каб у верасні навучэнцы прыступілі да заняткаў у камфортных умовах, — адзначае I. Сяргейчык. — Адпаведныя работы пачынаюцца яшчэ з пачатку лета. На падрыхтоўку ўстаноў адукацыі раёна да новага навучальнага года была выдзелена значная сума — больш за 5 млн рублёў. І кожнаму рублю ёсць прымяненне: перш за ўсё, сродкі ідуць на будаўніча-мантажныя работы па капітальным рамонце аб'ектаў, прывядзенне ў парадак спартыўных залаў і пляцовак, а таксама на стварэнне бяспечных санітарна-гігіенічных умоў.

Ажыццяўляецца капітальны рамонт дзіцячага сада № 7 Асіповічаў, а таксама валейбольнай, баскетбольнай і гандбольнай пляцовак сярэдняй школы № 1. Мадэрнізуюць аўтаматычную пажарную сігналізацыю ў Жорнаўскай сярэдняй школе імя Н. Ф. Каралёва. Акрамя таго, ва ўсіх установах адукацыі праходзяць касметычныя рамонты кабінетаў і іншых памяшканняў. Да добраўпарадкавання школ і іх тэрыторый актыўна падключаюцца падлеткі, якія наведваюць лагеры працы і адпачынку. На дапамогу навучальным установам прыходзяць і бацькі.

І. Сяргейчык адзначае: лета для аддзела па адукацыі заўсёды гарачая пара. Трэба не проста паспець усё зрабіць да 1 верасня, а выканаць запланаванае якасна, таму спешцы тут не месца.

— Лепш выдаткаваць больш часу, але пераканацца, што спрацавана на сумленне, — кажа яна. — Акрамя капітальных і касметычных рамонтаў, у некаторых установах адукацыі будзе заменена [аладзільнае, навучальнае, надворнае абсталяванне.

Значная ўвага ў раёне надаецца інавацыйным праектам. Так, з новага навучальнага года ў сярэдняй школе № 4 Асіповічаў плануюць рэалізаваць "Укараненне мадэлі педагагічнай падтрымкі прафесійнага самавызначэння навучэнцаў устаноў агульнай сярэдняй адукацыі праз арганізацыю сеткавага ўзаемадзеяння ўстаноў адукацыі і прадпрыемстваў рэгіёну". У 5-й школе — "Укараненне вучэбна-метадычнага забеспячэння выкладання факультатыўных заняткаў "Асновы духоўна-маральнай культуры і патрыятызму" ў 5-9-х класах". А на базе Цэльскай сярэдняй школы збіраюцца запускаць праект па сацыяльным партнёрстве сельскай школы з мясцовымі грамадзянскімі арганізацыямі. Праект па ўкараненні рэгіянальнай мадэлі грамадзянскага і патрыятычнага выхавання мяркуецца рэалізаваць адразу ў трох установах: Дараганаўскай і Ліпеньскай сярэдніх школах і ў дзіцячым садзе № 10 Асіповічаў.

osipovichi-region.by