30.07.2025

І зноў турзлёт! Спартакіяда працоўнай моладзі Асіповіцкага раёна прайшла 25-26 ліпеня

Сёлета мерапрыемства, якое ўжо не першы год праводзіцца на базе адпачынку "Бярозка", было прысвечана 80-годдзю Перамогі савецкага народа ў Вялікай Айчыннай вайне.

Праявіць творчыя і спартыўныя таленты падахвоціліся шэсць каманд: раённага выканаўчага камітэта, аддзела па адукацыі райвыканкама, ДЛГУ "Жорнаўская эксперыментальная лясная база", ААТ "ВязоўніцаАгра", УКП ЖКГ, ААТ "АЗАА".

А ацэньвалі вынікі іх намаганняў старшыня раённага аддзялення Беларускай партыі "Белая Русь" Юрый Данянкоў, галоўны спецыяліст аддзела ідэалагічнай работы і па справах моладзі райвыканкама Ларыса Волкава, загадчык раённага цэнтра культуры і вольнага часу Таццяна Сазановіч, першы сакратар РК "БРСМ" Юльяна Вараўко, старшыня Савета працоўнай моладзі раёна Ганна Лапаева.

Яркім і запальным стала знаёмства з камандамі — конкурс "Візітоўка". Большасць удзельнікаў у сваіх выступах так ці інакш абыгралі тэму Вялікай Айчыннай вайны і Перамогі. Пранізлівыя душу вершы і песні, танцы, сцэнкі — абыякавым не застаўся ніхто! Перамогу ў конкурсе візітовак падзялілі вопытныя каманды АЗАА і УКП ЖКГ, якія прадставілі сапраўдныя тэатралізаваныя паказы з багатым рэквізітам. На другім месцы райвыканкам і Жорнаўская база, на трэцім — "ВязоўніцаАгра".

У ходзе прэзентацыі лагераў кожная з каманд дэманстравала, наколькі тэматычна вытрымана, прадумана, утульна арганізаваны ў іх побыт. Тут зноў лідзіравалі каманды ЖКГ і АЗАА, на другім месцы Жорнаўская база і райвыканкам, на трэцім — "ВязоўніцаАгра" і педагогі. Завяршыўся першы спаборніцкі дзень конкурсам ваенна-патрыятычнай песні "Радкі, апаленыя вайной": гучалі як хіты ваенных гадоў, так і кампазіцыі ўласнага сачынення на матыў вядомых твораў. Перамогу прысудзілі камандам ЖКГ, АЗАА і райвыканкама, астатнія падзялілі другое месца. Песенны конкурс плаўна перайшоў у своеасаблівы танцавальны: на маладзёжнай дыскатэцы свае таленты змаглі раскрыць усе жадаючыя!

Раніца суботы пачалася з агульнай зарадкі, пасля якой каманды спаборнічалі ў трапнасці. Адначасова на трох пляцоўках удзельнікі спаборнічалі ў стральбе з пнеўматычнай вінтоўкі і дартсе, а таксама запускалі на далёкасць папяровыя самалёцікі. У гэты раз лепш за ўсіх пнеўматыкай валодалі Васіль Івашчанкаў (АЗАА) і Наталля Агафонава (Жорнаўская база). У дартсе перамогу атрымалі Іван Кісель (райвыканкам) і Наталля Лагун ("ВязоўніцаАгра"). А лепш астатніх запусціць папяровыя самалёцікі атрымалася Алегу і Наталлі Бандарчык ("ВязоўніцаАгра").

Самае чаканае спаборніцтва спартакіяды — паласа перашкод, якую штогод з задумай арганізоўваюць спецыялісты раённага цэнтра творчасці дзяцей і моладзі. Удзельнікам трэба было пракаціцца па тросе на "арэлі", пераадолець "пераправу" і "парталы", праскакаць па купінах, сінхронна рухацца на "лыжах" і прапаўзці пад "павуціннем". Найбольш тэхнічнай і зладжанай камандай прызналі дружыну АЗАА, на другім месцы УКП ЖКГ, на трэцім — райвыканкам.

Яшчэ адзін конкурс на спрыт і хуткасць — спартыўная эстафета. Уменне абыходзіцца з мячамі, ракеткамі, гімнастычнымі палкамі лепш за ўсіх прадэманстравалі "камунальнікі", трохі адсталі ад іх прадстаўнікі райвыканкама, трэцімі сталі педагогі.

Апошняе — і вырашальнае! — спаборніцтва прайшло на валейбольнай пляцоўцы. На працягу некалькіх гадзін каманды змагаліся за лідарства па кругавой сістэме. Традыцыйна лепшымі ў гэтым відзе спорту сталі валейбалісты АЗАА, саступілі ім педагогі, на трэцяй прыступцы — райвыканкам.

І вось, нарэшце, падвядзенне вынікаў. Трэцяе месца і 31 бал (па суме месцаў у конкурсах) у агульнакамандным заліку атрымала зборная УКП ЖКГ. Другое месца і 29 ачкоў у каманды раённага выканаўчага камітэта. А пераможцам раённай спартакіяды моладзі-2025 з адрывам ад канкурэнтаў у шэсць балаў стала каманда ААТ "АЗАА"!

— Летняя спартакіяда, якая традыцыйна праводзіцца ў фармаце турзлёту, — адно з найбольш чаканых традыцыйных мерапрыемстваў саюза моладзі, — адзначыла Юльяна Вараўко. — І ўдвая прыемна, што ва ўдзеле і выніку зацікаўленыя не толькі самі маладыя людзі, але і іх калегі старэйшыя, і кіраўніцтва арганізацый. Варта адзначыць цёплую, сяброўскую атмасферу турзлёту. Каманды актыўна падтрымлівалі адзін аднаго — гэта каштоўна. Дзякуй усім удзельнікам!

osipovichi-region.by