04.11.2025

"Дзікі трэйл-2025" прайшоў у Асіповіцкім раёне

Чарговае выпрабаванне для самых цягавітых, мэтанакіраваных, упэўненых у сабе аматараў бегу прайшло ў мінулую суботу ў нашым раёне. Акрамя шырока вядомага міжнароднага Асіповіцкага марафону, які праходзіць ужо больш за 40 гадоў запар у другую суботу красавіка, трэці раз у нас правялі і спаборніцтвы для тых, хто не шукае лёгкіх шляхоў. Прычым трэйлранінг - спартыўная дысцыпліна, якая прадугледжвае бег па прыродным рэльефе ў вольным тэмпе або рамках спаборніцтваў - набірае ўсё большую папулярнасць. І ландшафт тут адыгрывае не апошнюю ролю: у асяроддзі прыгожых відаў бегчы значна прыемней, а іх у нас дастаткова. Арганізатарамі рэспубліканскіх спаборніцтваў па бегу па перасечанай мясцовасці "Дзікі трэйл-2025" выступілі Беларуская федэрацыя лёгкай атлетыкі і Асіповіцкі райвыканкам.

1 лістапада на старты сваіх дыстанцый у аг. Вяззе выйшла каля 300 удзельнікаў усіх узростаў.

Прыемна, што колькасць жадаючых прабегчыся па мясцовых дарогах і сцяжынках расце: першы трэйл сабраў 180 лёгкаатлетаў, другі - 250. Дарослым аматарам бегу прапаноўвалася пераадолець адлегласці ў 54 км 610 м (траса Т50 праз Азярышча, Лапічы, Сасновы, Смык) і 10 км 400 м (траса Т10 з разваротам у раёне СТ "Дружба"). Пры гэтым асфальтавага пакрыцця было няшмат: у асноўным дыстанцыі пралягалі па бездаражы. Асабліва цікава было бегчы ультрамарафонцам, для якіх рэльеф быў вельмі разнастайным: прасёлачныя дарогі, рыбацкія сцежкі, ускраіны ўзараных палёў, бураломы і паваленыя дрэвы, лясы і пералескі, супрацьпажарныя палосы, розныя масты і шмат-шмат лужын і бруду пасля мінулых нядаўна шматлікіх дажджоў. А на працягу ўсёй гэтай разнастайнасці - найпрыгажэйшыя віды Асіповіцкага вадасховішча з розных ракурсаў.

Удзельнікі і балельшчыкі спаборніцтваў пачалі збірацца ў Вяззе з раніцы - першы старт быў прызначаны на 9.00. Самых падрыхтаваных і адчайных бегуноў аказалася 65: менавіта яны першымі адправіліся ў шлях даўжынёй больш за 50 км. Ліміт часу ў бегуноў быў восем гадзін. На трасе ўладкавалі пункты харчавання, каб стаеры маглі папоўніць энергію. Дарэчы, меню было вельмі прадуманым у гэтай сітуацыі: вада, гарачая гарбата, кісель, прысмакі, садавіна, бутэрброды з каўбасой і нават салёныя агуркі.

Абсалютным пераможцам ультрамарафонскай дыстанцыі стаў 39-гадовы Аляксандр Васілевіч, які нечакана для ўсіх пераадолеў дыстанцыю за 3 гадзіны 59 хвілін 45 секунд!

Другое месца заваяваў Мікалай Сяргейчык (4:08:30), трэцяе - пастаянны ўдзельнік Асіповіцкага марафону Сяргей Дыдышка (4:20:25) дарэчы, пераможца мінулага года Віталь Жаваранкаў, які прабег тады за 4:12:30, гэтым разам фінішаваў практычна адначасова з бронзавым прызёрам (4:20:26). А сярод васьмі жанчын абсалютнай пераможцай (і дзясятай у агульным заліку) у трэці раз стала 42-гадовая Вольга Краснапольская (4:46:33).

Паспрабаваць свае сілы каторы раз вырашыў і асіпаўчанін Максім Кандрацішка. Яго вынік - 6:45:06.

Зразумела, усе стаеры, незалежна ад дасягненняў, атрымалі сваю порцыю апладысментаў і віншаванняў: пераадолець такую дыстанцыю пад сілу далёка не кожнаму. Эмоцыі былі самыя разнастайныя: ад воклічаў на дыстанцыі "Ну дзе ж гэта Вяззе?" да бясконцай радасці ад пераадолення шляху на фінішы. Разам з людзьмі радаваўся і чатырохногі сябар ультрамарафонца Аляксандра Гурыкава: нароўні з гаспадаром сабака не ў першы раз пераадолеў усе перашкоды трасы.

На дыстанцыі Т10 гэтым разам вырашылі выступіць 165 бегуноў. Стартавалі яны ў 11 гадзін, а ўжо праз 36 хвілін 10 секунд фінішаваў абсалютны пераможца гэтай намінацыі: 26-гадовы Аляксей Міронаў (ён жа быў лідарам і летась). Другое месца заняў Ілля Качэтыгаў (36:21), а замкнуў тройку лідараў Мікалай Нешытай (38:01).

Сярод жанчын пераможцай на дыстанцыі 10 км стала асіпаўчанка, удзельніца клуба аматараў бегу "Аматар" Ганна Лятун. Яе час - 39:40, а ў агульным заліку дзяўчына стала шостай. Цікава, што сярод бегуноў на 10 км былі і зусім юныя ўдзельнікі: Яна Дабравольская (14 гадоў), Паліна Сцяцэнка (15 гадоў), Крысціна Карнялюк (16 гадоў). Так, спаборніцтвы для дарослых, але пры вялікім жаданні і тыя, хто маладзейшы за 18, таксама могуць удзельнічаць з дазволу бацькоў. Самы ўзроставы ўдзельнік - 71-гадовы Сяргей Ярашэвіч.

Годна выступілі і асіпаўчане Мікіта Скарабагатаў, Аляксандр Анікееў, Васіль Івашчанкаў, Сяргей Дамарад.

- Надвор'е класнае - якраз бегавое. Траса шыкоўная: слізка, бруд - беглі як ласі па кукурузе, - са смехам распавяла Ганна Лятун. - У цэлым жа мерапрыемства выдатнае, атмасфера святочная. Усім бег!

Найбольшую колькасць эмоцый выклікаў яшчэ адзін забег — сямейны. А галоўнымі яго ўдзельнікамі сталі 55 хлопчыкаў і дзяўчынак ад трох гадоў. Разам з мамамі і татамі хлопцы прабеглі, праехалі на самакатах або бегавелах амаль кіламетр па вул. Багдановіча. Усе сем'і паспяхова справіліся з пастаўленай задачай, а на фінішы юных бегуноў чакалі яркія памятныя медалі ад генеральнага партнёра спаборніцтваў ААТ "Белаграпрамбанк" і салодкія падарункі.

Па заканчэнні забегаў правялі цырымоніі ўзнагароджання пераможцаў і прызёраў на дыстанцыях Т50 і Т10 ва ўзроставых групах. Усе, хто падняўся на п'едэстал гонару, атрымалі памятныя падарункі ад партнёра спаборніцтваў - брэнда Bionova, а пераможцы - таксама сертыфікаты на розныя грашовыя сумы.

- Нягледзячы на пагодныя складанасці напярэдадні лічу, што наш чарговы "Дзікі трэйл" атрымаўся! - пракаментавала прадстаўніца каманды арганізатараў мерапрыемства, мясцовая лёгкаатлетка Таццяна Гурская. - Асобны дзякуй за дапамогу сектару спорту і турызму райвыканкама, нашым спонсарам - кампаніі "Дарыда", а таксама камандаванню і вайскоўцам 465 ракетнай брыгады, якія прынялі непасрэдны ўдзел у арганізацыі работы пунктаў харчавання на дыстанцыі. Спадзяюся, у наступным годзе забегі стануць яшчэ больш маштабнымі, збяруць у разы больш аматараў актыўнага вольнага часу. Бо дыстанцыі ў нашым раёне не толькі цікавыя для сапраўдных знатакоў бегу, але і прыгожыя - вартыя таго, каб іх пераадолець!

osipovichi-region.by