10.06.2025

Дэлегацыя Асіповіцкага раёна прыняла ўдзел ва ўрачыстым адкрыцці Нацыянальнага футбольнага стадыёна

Нашы адносіны з дружалюбным Кітаем увасабляюцца не толькі ў гандлёва-эканамічных праектах, культурным і гуманітарным супрацоўніцтве, але і ў прыгожых сучасных аб'ектах, якія могуць наведаць тысячы беларусаў. І вось як раз такое суперсучаснае спартыўнае збудаванне — Нацыянальны футбольны стадыён — атрымаў беларускі народ ад кітайскіх партнёраў. У мінулую суботу ў сталіцы прайшла ўрачыстая цырымонія адкрыцця спартыўнай арэны.

На знакавае мерапрыемства прыехалі госці з усёй краіны. Прысутнічала і дэлегацыя Асіповіцкага раёна на чале з намеснікам старшыні райвыканкама Ганнай Зямлянухінай. У склад дэлегацыі ўвайшлі прыхільнікі актыўнага ладу жыцця з розных арганізацый і прадпрыемстваў рэгіёна.

Для Мінска гэта не першы маштабны спартыўны аб'ект, які будавалі нашы сябры з Кітая. Літаральна паўгода таму ў сталіцы адкрыўся самы вялікі басейн у Беларусі. А цяпер — самы ёмісты стадыён з больш чым 33 тыс. месцаў для гледачоў.

Нацыянальны футбольны стадыён уражвае размахам, габарытамі, знешнім маляўнічым ультрасучасным выглядам. Для выгоды і камфорту гледачоў тут прадугледжана ўсё: VIP-ложы, месцы для работы СМІ на трыбуне, ёмісты прэс-цэнтр, трэнажорная зала, распранальні, дзіцячы цэнтр, памяшканні для камерцыйнага выкарыстання, падземная і наземная паркоўка, паркавая зона і гэтак далей. Уражвае і інфраструктура аб'екта: футбольнае поле з падагрэвам, святлодыёдным падсвятленне, два гіганцкіх медыяэкрана і многае іншае.

Гэтая арэна адпавядае чацвёртай катэгорыі УЕФА, якая дазваляе праводзіць матчы фінальных стадый чэмпіянатаў свету і Еўропы, Лігі чэмпіёнаў і Лігі Еўропы, а таксама Суперкубка УЕФА.

Артысты, якія выступалі перад цырымоніяй адкрыцця, не саромеліся рабіць кампліменты стадыёну. Напрыклад, заслужаны артыст Беларусі Аляксандр Саладуха назваў стадыён казкай, а спявак Тэа падзякаваў за такі шыкоўны падарунак кіраўніцтву Кітая і ўсем службам, якія былі датычныя да ўзвядзення стадыёна. Яркай атрымалася і сама цырымонія адкрыцця. У творчых нумарах артысты пастараліся паказаць узаемапранікненне культур.

Падчас цырымоніі адкрыцця Прэзідэнт Беларусі Аляксандр Лукашэнка выказаў надзею, што ўзровень гульні айчынных клубаў і асабліва зборных будзе адпавядаць створаным для іх умовам. Беларускія футбалісты, атрымаўшы такі падарунак, нарэшце пачнуць апраўдваць чаканні, а гледачы ўбачаць з трыбун яркія перамогі.

Далей пачаўся матч паміж маладзёжнымі (да 21 года) камандамі Беларусі і Кітая. Першы тайм прайшоў без забітых мячоў. Пасля перапынку на 47-й хвіліне гаспадары зарабілі пенальці. Мікіта Абаранкаў прабіў дакладна, упісаўшы сваё імя ў гісторыю, — ён аўтар першага гола на новым стадыёне. Сустрэча завяршылася баявой нічыёй — 1:1.

Землякі, якія пабылі на цырымоніі адкрыцця, дзеляцца сваімі эмоцыямі.

Юльяна Вараўко, першы сакратар РК "БРСМ":

— Адкрыццё нацыянальнага футбольнага стадыёна ў Мінску пакінула незабыўныя ўражанні. Прыехалі людзі з усіх куткоў краіны, і я адчула яднанне ўсіх прысутных, якія сабраліся, каб адсвяткаваць гэты важны момант для Беларусі. Стадыён сапраўды ўражвае сваім сучасным дызайнам і маштабамі. Гэта месца, якое будзе не толькі арэнай футбольных матчаў, але і цэнтрам розных мерапрыемстваў.

Ірына Белянова, галоўны спецыяліст юрыдычнага сектара райвыканкама:

— Цырымонія адкрыцця была яркай і запамінальнай. Артысты сапраўды імкнуліся паказаць разнастайнасць беларускай культуры, іх выступленні былі напоўнены станоўчай энергіяй. Калі Прэзідэнт Беларусі Аляксандр Лукашэнка гаварыў пра будучыню беларускага футбола, я адчула надзею, што з такімі ўмовамі нашы каманды змогуць падняць планку і паказаць добрыя вынікі.

Ганна Заяц, намеснік начальніка аддзела статыстыкі Асіповіцкага раёна:

— Матч паміж маладзёжнымі зборнымі Беларусі і Кітая стаў выдатным завяршэннем вечара. Нягледзячы на нічыю, была рада бачыць першы гол на новым стадыёне — гэта момант, які застанецца ў гісторыі. У цэлым адкрыццё стадыёна стала важным крокам у развіцці спорту ў нашай краіне, і я з нецярпеннем чакаю новых матчаў і падзей, якія тут будуць праходзіць.

osipovichi-region.by