17.03.2025

Чацвёра прадстаўнікоў Асіповіцкага лакаматыўнага дэпо прынялі ўдзел у заключным этапе конкурсу прафесійнага майстэрства работнікаў лакаматыўнай гаспадаркі беларускай магістралі

У заключным этапе конкурсу прафесійнага майстэрства работнікаў лакаматыўнай гаспадаркі беларускай магістралі, які прайшоў у Гомелі, прынялі ўдзел і чацвёра прадстаўнікоў Асіповіцкага лакаматыўнага дэпо: машыніст электравоза Антон Папоў і памочнік машыніста электравоза Уладзімір Нікалайчанка, машыніст электрацягніка Сяргей Кісель і памочнік машыніста электрацягніка Дзмітрый Еўдакіменка.

На працягу двух дзён чыгуначнікі аспрэчвалі званне лепшых у сваёй намінацыі. І вось вынікі: Антон Папоў заняў другое месца, Уладзімір Нікалайчанка - трэцяе.

- Вынік заканамерны: рыхтаваліся грунтоўна, — распавядае намеснік начальніка дэпо па эксплуатацыі Дзмітрый Белы. - Правялі прафесійнае спаборніцтва на сваім прадпрыемстве, пераможцаў якога ўзмоцнена рыхтавалі, давалі ім розныя заданні, адпрацоўвалі на практыцы.

- Гэты конкурс для мяне другі, - дзеліцца Антон Папоў. - Першы праходзіў у Жлобіне. Заданні былі зразумелыя, бо на практыцы іх даводзіцца выконваць пастаянна, а хутка прымаць рашэнні нашы лакаматыўныя брыгады ўмеюць, як і знаходзіць выхад з няштатных сітуацый. Рады за вынік таварыша Уладзіміра Нікалайчанкі, з якім даводзілася ездзіць у складзе адной лакаматыўнай брыгады. Ён талковы спецыяліст, будучы машыніст.

Конкурс прафмайстэрства праходзіць на Беларускай чыгунцы штогод. Ён закліканы ўдасканальваць прафесійныя навыкі работнікаў, павышаць узровень кваліфікацыі і стымуляваць творчую ініцыятыву. І асіпаўчане заўсёды дэманструюць у ім высокія вынікі.