12.06.2025

9 медалёў заваявалі асіпаўчане на хатнім першынстве краіны па тайландскім боксе

4-8 чэрвеня ў Асіповічах праходзіла першынство Рэспублікі Беларусь па тайландскім боксе сярод юнакоў і дзяўчат ад 10 да 13 гадоў.

Тайландскі бокс - спартыўная дысцыпліна з ліку "візітак" нашага горада. Таму нядзіўна, што чарговае першынство Беларусі па муай-тай сярод юніёраў і юніёрак прайшло ў нашым гасцінным краі.

Гэтыя спаборніцтвы сталі афіцыйным адборам на першынство свету, якое пройдзе ў сталіцы ААЭ горадзе Абу-Дабі з 19 верасня.

Змагацца за перамогу ў мясцовым ФАК "Юнацтва" сабралася больш за 160 спартсменаў фактычна з усіх куткоў краіны. На цырымоніі адкрыцця 6 чэрвеня прысутнічалі першы намеснік старшыні "Беларускай федэрацыі кікбоксінга і тайландскага бокса" Анатоль Сімончык, галоўны трэнер Нацыянальнай зборнай каманды Рэспублікі Беларусь па ўсходніх відах адзінаборстваў Віталь Цішуроў і загадчык сектара спорту і турызму райвыканкама Аляксей Мурашко.

Анатоль Сімончык уручыў пасведчанне майстра спорту Вадзіму Шапяцюку, Міхаілу Мельнікаву, Цімафею Коршаку і Даніілу Арцёменку.

Ад Асіповічаў выступалі байцы як ужо зрабіўшыя сабе гучнае імя ў тайскім боксе, так і дэбютанты. Усяго за гонар нашага горада змагалася дзесяць выхаванцаў Сяргея Гідуляна, Эдуарда Міховіча, Кірыла Скарабагатава і Ягора Ровбеля з мясцовых ДЮСШ і клуба Golden Victory.

Вынікі землякоў аказаліся як заўсёды на вышыні. Так, залатыя медалі ў сваіх вагавых катэгорыях заваявалі Ксенія Караленя, Данііл Кузняцоў і Сабрына Аляшкевіч. Срэбра дасталася Паўлу Талкачу і Яраславу Пятроўскаму. Бронзавыя медалі ўзялі Кірыл Бурак, Арсень Гаврутчанкаў, Станіслаў Чыхуноў і Цімур Патапаў.

osipovichi-region.by