30.06.2025

25 чэрвеня ў Асіповічах прайшлі мерапрыемствы ў рамках марафону моладзі і студэнцтва

25 чэрвеня Магілёўская вобласць прыняла эстафету Рэспубліканскага марафону моладзі і студэнцтва пад дэвізам "Усё залежыць ад нас".

У нашым раёне марафон пачаўся з патрыятычнай акцыі "Беларусь памятае. Памятаем кожнага" каля помніка ахвярам фашызму каля вёскі Цяплухі. Прадстаўнікі райвыканкама, арганізацый і прадпрыемстваў горада, члены РК БРСМ і РГА "Белая Русь" ушанавалі хвілінай маўчання памяць загінуўшых і ўсклалі кветкі да падножжа помніка. Гэты рытуал стаў напамінам аб цане мiру i неабходнасці берагчы гістарычную праўду.

Праграму мерапрыемстваў працягнуў велапрабег "Адзінства моладзі". Удзельнікі праехалі маршрут ад помніка каля вёскі Цяплухі да стадыёна  Юнацтва", дзе моладзь прыняла ўдзел у турніры па валейболе "Імклівы мяч".

Праверыць веданне гісторыі Вялікай Айчыннай вайны член маладзёжнага савета пры Савеце Рэспублікі Нацыянальнага сходу Рэспублікі Беларусь Віялета Аляшкевіч прапанавала ў квэсце "Памяць юных сэрцаў", які прайшоў у гарадскім парку. На імправізаваных станцыях удзельнікаў чакалі інтэлектуальная гістарычная віктарына, рашэнне тэматычнай крыжаванкі, удасканаленне навыкаў аказання першай медыцынскай дапамогі і стварэнне насценгазеты "Iх імёнамі названы вуліцы нашага горада".

Цяперашняя моладзь імкнецца не толькі захаваць гісторыю, але і прымножыць яе добрымі справамі. Працоўны дэсант актывістаў РК ГА "БРСМ" сумесна са старшынёй райвыканкама Андрэем Дубінчыкам, намеснікам старшыні Ганнай Землянухінай і работнікамі УКП ЖКГ працаваў над добраўпарадкаваннем сквера на вуліцы Абросімава. Агульнымі намаганнямі прыведзены ў парадак клумбы і хмызнякі, скошаная трава. Не абышлося і без папаўнення ведаў: кіраўнік па ваенна-патрыятычным выхаванні СШ № 5 Андрэй Лянчэўскі распавёў удзельнікам дэсанту гісторыю помніка-скульптуры "Партызан". Пасля заканчэння работ прысутныя ўсклалі да манумента кветкі.

Завяршыла марафон інтэлектуальна-пазнавальная гульня "Сіла ў адзінстве". Тры маладзёжныя каманды шукалі адказы на пытанні, прысвечаныя дзяржаўнай сімволіцы, Канстытуцыі і гісторыі Вялікай Айчыннай вайны, даведваліся сучасныя аб'екты райцэнтра на фотаздымках мінулага стагоддзя. Хлопцы, якія паказалі лепшыя вынікі, атрымалі дыпломы ад РК ГА "БРСМ".

osipovichi-region.by