• Прыём дакументаў на атрыманне прафесійна-тэхнічнай адукацыі на базе 9 класаў пачнецца 15 чэрвеня і працягнецца да 23 жніўня.

— У гэтым годзе аднаўляецца падрыхтоўка дзяцей па кваліфікацыі "Электраманцёр па рамонце і абслугоўваннi электраабсталявання трэцяга разраду", — адзначае намеснік дырэктара па вучэбна-выхаваўчай рабоце Вольга Пруднікава. — Апошні выпуск па гэтым напрамку быў у 2020 годзе. Зараз у нашым раёне ёсць патрэба ў спецыялістах дадзенага профілю, таму плануем прыняць 25 чалавек. Дарэчы, набраная група адначасова будзе навучацца па кваліфікацыі "Тынкоўшчык 4 разраду. Маляр 3 разраду". Гэта дасць магчымасць павысіць узровень прафесійных навыкаў маладых спецыялістаў і забяспечыць іх больш шырокімі магчымасцямі для далейшага працаўладкавання. Сумяшчэнне праграм мае на ўвазе падрыхтоўку да выканання рознапланавых задач на будаўнічых аб'ектах.

Таксама ў каледжы прапануюць навучанне па кваліфікацыях "Прадавец 4 разраду. Кухар 4 разраду", "Швачка 3 разраду. Цырульнік 4 разраду", "Слесар па рамонце сельскагаспадарчых машын і абсталявання 4 разраду. Трактарыст-машыніст сельскагаспадарчай вытворчасці катэгорый С, D. кіроўца катэгорыі С", "Тынкоўшчык 4 разраду. Маляр 3 разраду. Электрагазазваршчык 3 разраду". Навучанне па ўсіх спецыяльнасцях доўжыцца два гады дзесяць месяцаў.

— Арганізацыямі раёна пададзеныя заяўкі на мэтавую падрыхтоўку 17 спецыялістаў, — распавядае Вольга Уладзіміраўна. — Заводу транспартнага машынабудавання патрабуецца дзесяць, а "Асіповічыгазбуду" адзін электрагазазваршчык, сельскагаспадарчым прадпрыемствам "Ясеньскае", "Авангард-Ніва" і "ЖорнаўкаАГРА" — трактарысты-машыністы.

• Залічэнне ў каледж ажыццяўляецца на аснове сярэдняга бала пасведчання аб агульнай базавай адукацыі. Хлопцы, якія паступаюць па праграме мэтавай падрыхтоўкі, не ўдзельнічаюць у агульным конкурсе. Аднак магчымы конкурс сярод "мэтавікоў" пры наяўнасці вялікага попыту на адну спецыяльнасць.

Атрымаць дадатковую інфармацыю аб правілах і ходзе прыёму дакументаў, а таксама прайсці анлайн-кансультацыю для паступаючых можна на сайце Асіповіцкага дзяржаўнага каледжа lc8.by.

• Дарэчы, каледж дае навучэнцам не толькі магчымасць атрымаць карысную прафесію, але і ўмовы для пражывання: іншагароднія ў абавязковым парадку забяспечваюцца месцам у інтэрнаце, а таксама бясплатным харчаваннем.

osipovichi-region.by